Parlamentera HDPyî Feleknas Ûcaya ke çend rojî verê bi heyetêk şî Başûrê Kurdîstanî û ewja de Kampa Mexmûrî zî zîyaret kerd, yewîye ser o wina va: “Ganî seba yewîya neteweyî gamî bêrî eştene. Yan ma do bibî yewe û hêrişan bivindarnî, yan zî ma do yew bi yew bêrî qetilkerdene û tewqîfbîyayene.”
Parlamentera HDPyî ya Êlihî Feleknas Ûca, Parlamentera HDPyî ya Amedî Semra Guzele û Parlamentera HDPyî ya Şirnexî Nûran Îmîre zî tede heyetêka cinîyan çend rojî verê şîye Başûrê Kurdîstanî û ewja de tayê pêvînayîşî kerdî.
Endamê heyetî agêrayî labelê Ûca ewja de pêvînayîşê xo domnayî. Ûca kampa Mexmûrî ke nizdîyê 2 aşmî yo ke binê ambargo de ya zî zîyaret kerd. Ûca ajansê Jinnewsî ra Berîtan Canozere rê qisey kerde û dîyar kerde ke ê seba yewîya Kurdan, qezencê cinîyan û têkoşînî qisey bikerî şîyî Başûr û wina domnaye: “Ma heme partîyanê sîyasîyan de pêvînayîşî kerdî. Ma ewja de babeta ‘ma senî eşkenî têkoşînê cinîyanê Kurdan gird bikerî, ma eşkenî çi bikerî?’ ser o qisey kerd.”
Ûca dewamê qiseykerdişê xo de va ‘ma yewîya cinîyanê Kurdan ser o qisey kerde’ û wina dewam kerde: “Vakur de vera sîstemê hemserekîye de hêrişî estî, qayûmî tayîn benî. Başûr de polîtîkaya dagîrkerî û hêrişî zêde benî. Rojawan de hîna zî tehdîdî dewam kenî. Raştîya xo de problemê her çar parçeyan zî eynî yo. Ma do xoverdayîş û têkoşînî gird bikerî.”
Şarê Mexmûrî ser o ambargo esta
Ûca qiseykerdişê xo de qala ambargoya ke Kampa Mexmûrî ser o esta kerde û wina va: “Kampe de 13 hezar bextwaştoxî manenî û ti kes nêşêno ewja ra vejîyo teber. Kes nêşêno şêro nêweşxane, mekteb û kar. Ewja bîyo zîndanêko akerde. Ganî nêyî bêrî çareserkerdene. Ê kesî seba ke tîya de dewê înan ameyî veşnayene mecbûr mendî ke koç bikerî. Şert û mercê înan zaf giran î, labelê reyna zî manenî. Ganî zextî bêrî qedênayene.”
Şar zî yewîye wazeno
Ûca qiseykerdişê xo de va ‘qezencê cinîyan tehlukede yî’ û wina qedênaye: “Ma no het de xeylê pêvînayîşê muhîmî kerdî. Ma şarî reyde zî ameyî têhet. Şar zî wazeno ke wa êdî Kurdî bibî yewe. Şar wazeno ke wa herkes vera dagîrkerî û asîmîlasyonî de pîya hereket bikerî û berpirsîyarî bigîrî. Ganî rihê Kobanê yewna rey awan bibo. Eke şar reyna sey Kobanê bêro têhet, o wext eşkeno têkoşînêko ortax bido. Eke wina bibo o wext ma serkewenî. Seba yewîya neteweyî zî ewil ma cinîyî gamî eştî û ma do têkoşîn zî bidî. Ma do hêzê cinîyan nîşan bidî. Eke ma nêbî yewe qezencî do destê ma ra şêrî. Çi yeno sereyê ma yewnêbîyayîşî ver yeno. Yan ma do bibî yewe hêrişan bivindarnî, yan zî ma do bêrî qetilkerdene, tewqîfbîyayene. No deynê ma yo. Ma bawer kenî ke rojanê ameyoxî de gamê muhîmî bêrî eştene.”
AMED