Wextê xoverdayîşê xoserî de Sûr, Cizîr, Nisêbîn, Farqîn, Hezex, Şirnex, Gever û sewbîna cayan de xeylê qehremanî ameyî nîşandayîş û hîkayeyê înan bi tîpanê altûninan tarîx de ameyî nuştiş. Nînan ra yewe zî wextê xoverdayîşê Hezex de ame cuyayîş. 

Yayke Sozdar Gasyake (Sozdar Zinarîne) û wareza Tajdîn Gasyak (Botan Tajdîn) vera hêriş û abluqayê dewleta tirkî de xoverdayîşêko destanî nîşan dayî û bîyî bêmir. Hîkayeya yayke û warezayî wina ya: 

Tajdîn Gasyak (Botan Tajdîn) qezaya Hezexî ya Şirnex de yeno dinya û keyeyê xo de waye û birayan ray ê 4. o. Tajdîn hîna dibistana seretayî de seba ke sîstemê perwerdeyî yê tirkî ra eciz beno, wazeno fek dibistane ra verado, la bi zorîya keyeyî dibistana seretayî qedêneno. Dima ra badê serrêk reyna agêreno mekteb û wextê lîseyî de wazeno ke bi ziwanê xo perwerde bivîno. 

Tajdin kedkar o

Tajdîn seba ke rewşa ekonomîke ya keyeyî baş nîya, her çiqas ke ci ra pîlêr 3 birayê ci estî zî, berpirsîyarî gêno milê xo ser. Goreyê vatişanê embazanê ci Tajdîn kesêko rêzdar û heskerdişî reyde pirr o û mîyanê şarî de zaf yeno heskerdiş. Wexto ke embazê ci qala Tajdînî kenî, vanî ke Tajdîn kesêko hetê kede û têkoşînî de zaf averşîyaye yo, tebîet û heywanan ra zaf hes keno. Cok ra ge-ge hetkarî dano pîyê xo yo ke şiwanetî keno. Tajdîn wexto ke prosesê Kobanê dest pêkeno, beşdarê xebatanê ciwanan beno û nizdîyê di serran rojname û kovare vila keno. Her çiqas ke nêweşîya brucella ci reyde esta zî Tajdîn zaf xebetîyeno. Wextê xoverdayîşê Kobanê de perwerde vîneno û dima ra beşdarê YDG-Hyî beno.  

Sozdarêka bîn bena 

Sozdar Gasyake (Sozdar Zinarîne) zî Hezex de yena dinya. Keyeyê aye welatperwer o, xora nameyê Sozdare zî nameyê gerîlayêka cinî yê PKKyî yo. Sozdare zî wextê wendekarîya xo de bi wendişê kitabê Rayberê Şarê Kurd Abdullah Ocalanî hewl dana nasnameya xo awan bikera. Sozdare hem wanena û hem zî wextê betlaneyî de sey karkerîya demserrî xebetîyena. Sozdare hem jîhatî ya û hem zî şermok a, cok ra hetê embazanê xo ra zaf yena heskerdiş. Sozdare seba ke zulmo ke îqtîdarê AKPyî û Erdoganî vînena, beşdarê YDG-Jinî bena. 

Xoverdayîşî weçînayî

Pîyê Sozdare Alî Şamanî derheqê kênaya xo de wina va: “Ez kênaya xo reyde îftîxar kena. Ya bi waştişê xo nê rayîrî weçînaye. Dewlete ya û heme embazanê aye bi hawayo zalimane qetil kerde. Ez têkoşînê kêna, torin û embazanê înan reyde îftîxar kena.” 

Dayîka Tajdînî Fahrîye Gasyake zî va ‘hem waya mi û hem zî lajê mi teslîmîyetî nê, xoverdayîşî weçînayî. Ya raşt zî na bî. Çimkî wayîrê rastikên yê nê erdan, ciwanê ke seba nê erdî canê xo danî yî. Înan seba xeyal û hêvîyanê xo canê xo feda kerdî. Helbet do yewe roje hesabê nînan bêro persayîş. Ez do heta peynî pey têkoşînê înan de biba.”


YAŞAR AKSU / ANF / ŞIRNEX