Rojê jû cenîke lajê xo gêna û şina leyê Gandî û ci rê  vana: “Gandî lajê mi zaf şekir weno, keremê xo ra ti êşkenî ey rê vaje şekir seba weşîya ci rind nîyo?” Gandî bi sebir goş dano nê waştişê mayî ser.  Pey cû nêwazeno ke lajekî ra çîyek vajo û înan ra vano ke badê di hefteyî ra tepya reyna bîrê leyê mi. Bawerîya maye bi Gandî şikîyena û bi ê hewayî leyê ey ra şina. Pey di hefteyî ra apey şinê. 

Gandî lajek beno yew quncik û teme keno ke çîyo rind o yo ke hende zaf şekirwerdiş ra fek biverdo ra. Lajek ey ra vano ke seba ke şekir ra fek raverdo ey dest ra çi êno do bikero. Naye ra serkewte cenîke bi merax Gandî bena yew qoşe û ci ra pers kena ke çira di hefteyî ra pey lajek teme kerdo? Gandî perpeşîyeno we û vano: “Di hefteyî ra ver ez bi xo zî bendeyê şekirî bîya. Mi şekir ra fek verda ra, mi rê dem lazim bi ke, ka ez bivîna wexto ke merdim şekirî caverdano se beno.” Û raştî zî lajekî şekir caverdano. 

Sebebo tewr girîng ê bi na mesele dest bi nuştişî kerdişî oyo ke, nê rojan de kesê ke bawerî kenê û nêkenê pîya bimecburî xover danê. Seranserê hîrê seranê prosesê halkerdişî de her yewê ma seba ke havila xo bireso bi nê prosesî dest ra çi ame kerd. Labelê kêmî û nebesîyê ma û ge-ge zî helwestê ma yê ke yew çî pawenê, bi demanê ke ma tena temaşê kenîme û pawenîme, ma bes nêkerd ke vera dewlete bi israr xoverdîme û haştîye bîyarîme. 

No qonaxî yo ke ma ewro restîme ci de, bedelê helwestanê ke verê xo nêvînenê, yê kesanê sey ma yê ke bereyîya wareyê sîyasetê legalî kenê, şarê kurdî û Kurdîstanî mecbur mend ke bido. Demo ke ez agêrena û xo pey de nîyadana eşkena vajera ke, a roje ra bi na roje bêbawerîye bi yew cewhero ke xizmetê prosesê tesfîyeyî kena, cuya ma rewşa amedeye de kerda serûbin û nêzdîbîyayîşê ma yê bi xoverdayişî kerda mîyanê yew rewşa didile. Ma eke bi erjanê moralî yê şorişgerîye, xodestfîştişê/qezencê xoverdayîşî xo rê sey binaşe bigirewtêne û bêvind ber biyardêne û organîze bibîyêne û hêzê xo bikerdêne yew, pratîkê wareyê 3’î yo ke zaf sereyîy ra çerexîyeno bi zaf vengîye ser nîşan bidayêne, ewro şarê ma bi hewayê pêroyî nêbîyêne hedefê galkerdişan. Eke sere de erj û mana biderîyayêne bi xoverdayîşê qirkerdişê/jenosîdî bide vindarnayene yo ke bingehê pawitişê meşruyî ser o bi xendekan dest pêkerdo, mîyan ra wedarnayîşê zemînanê ke ser o xoverdayîşê xendekan ênê têver nayêne (munaqeşe kerdene), hende derg nêramitêne û yew nêzdîbîyayîşo ke demê  nê têvernayîşan keno derg nêvejîyayêne meydan. 

Ciwanê ke bawerîya şorişî kenê û her tewir fedakarîye kenê, sey pratîk û ruhê Gandhî yê na hîkaye, bereyîya nê xoverdayîşî kenê û na bereyî û nê xoverdayîşî reyna hêzê bawerbîyayîşî ard ma vîrî, bawerîya înan bêbawerîya ma kerde têser û têbin ra, awanîye tesfîyekerdoxî yê zereyê ma û tesîrê înanê ke ma ser o mendê teşhîr kerdî. Û naye ra serkewte ma xo de ameyme têru. Na merhela xo de têruameyîşî de seba ma her yewî yo ke wad kerdo ke reyna şekir mewo, dem o demo ke piştî û hêz biderîme nê prosesî yo ke ciwanî bereyîya ci kenê, her tewir sebebî ra fek raverdîme û bingehê çalakîya pozîtîfe ser o, wareyanê xoverdayîşî vêşî/zîyade kerîme.

Dem o dem o ke her yewê ma xebatanê xo de mesulîyetê ke girewtê xo ser ganî (gere) bi serkewtiş bîyaro ca û dim a her şehîdî ale bikero berz. 

Not: Meseleya “Hengimenî” yê Îmamê Azamî zî manena bi na mesele.