Azayanê MEDÎADER aşma Remezan de ramitişê operasyonanê îmha yê AKP rê nêrazîbiyen damûsna û veng day pêrokîn misilmanan ke dûştê zilm û zaliman de vinderê.
Hikûmeta AKP rixmê aşma bimbarek Remezan kerdenanê lej û zorvajî de israr kena. Azayanê Komeleya Alîmanê Dîn yê Mersîn (MEDÎADER) nê polîtîkayanê herb yê AKP rê nêrazîbiyen damûsna.
Azayê MEDÎADER Mele Mehmet Korkmaz’î vist vîrî ke dûr û nezdî ra eleqeyê AKP bi misilmaney çinyo. Korkmaz’î aşkere kerd ke na aşma haştî Remezan de zî AKP kiştişê doman û cenîyan plan kena û wina dewam kerd: “Goreyê îslam kamcî bawerî de bibo wa bibo merdeyan rê dest dergî heram o. La Tirkîye de însanan kişenê, kindir erzenê milê ci û kuçeyan de pey panzeran de kaş kenê.”
Dûştê îslamîyet o
Mele Mehmet Korkmaz’î da zonayen ke Aşma Remezan taca pêrokîn aşman a û vist vîrî ke homayî (haq) na aşm de lej û pirodayişî kerdo tomet. Kormaz’î ard ziwan ke Aşmê Recep, Şaban û Remezanî aşmê bêvengî yê û qiseyê xo wina domna: “Nê aşman de ramitişê polîtîkayanê herb dûştê îslamîyet ê. Îxtidara AKP ke her tim behsê misilmantî kena însanan qir kena, heqanê ci xesp kena. Kam ke îman û îtiqat keno gune (gerek) eve vatiş û pratîkê xo dûştê na zilmî vejero, serre wedarno û xover bido.” Mele Mehmet Korkmaz’î veng da Mele û Şêxanê kurd zî û waşt ke vera zilmî serreyê xo wedarnê (hewadê) û zaliman teşîr bikerê.
Xo bi dînî xapînenê
Azayê bîn yê MEDÎADER Fahrettîn Çakmak’î zî hayr ant ayeta Qûran’î ser û da zonayen ke pêrokîn însanî jû may û pî ra bîyê. Çakmak’î vist vîrî ke jû homet ser hometa bîn de berzêr nîya û vatişê xo wina ramitî: “Gune însanî pêrokîn ayetanê Qûran’î bişinasnê. Eke ti nêsilasnê bawerîya ey tam nêbena. Derheqê reng û ziwanan de zî ayetî estê. Berzêrîya jew ziwanî ser yê bînî çinyo.”
Fahrettîn Çakmak’î vist vîrî ke Reîscûmhûrê Tirkîye Erdogan nimaz keno, roce tepêşeno û wina va: “Îslamîyet tenya îbadet nîyo, îbadet ra vêşêr (jêde) Qûran’î de behsê hiqûq û edalet beno. Edalet fermanê homa ya. La çi heyf ke roja ewroyîn de hina nîyo. Xo bi dînî xapînenê. Cîyakarî kenê. No zî beno sebebê merdiş, qetlîam, rijnayiş û zilmî. Gune zey Mele û Alimê dîn ma nê heqan însanan ra vajê. Gerek herkes bizano ke kes kesî ra berzêr nîyo.”
Seddamî ra beter zilm kenê
Azayê Komeleya Alîmanê Dîn yê Mersîn Îhsan Zengîn’î zî hayr ant lejê AKP ke Kurdistan de ramena ser û da zonayen ke Kurdistan de xêlê sûk û qezayî amey rijnayen. Zengîn’î da zonayen ke qe jew welatê îslamî bi no şiklî herb nêrameno û wina va: “Lej o ke Kurdistan de hetê AKP yeno ramiten eleqeyê ci bi îslamîyetî çinyo. Eke jew welat misilmanbo keyeyê însanan nêrijneno, însanan nêkişeno. Kes nêşeno halûnê jû mirîçik zî birijno, xirab bikero. La nê keyeyê însanan rijnenê.Lej o ke Tirkîye de yeno ramiten qe jew cayî de nêame vînayen.” Îhsan Zengîn’î vist vîrî ke kes endî nêşkeno xo rehat îfade bikero û aşkere kerd ke yhe ke qisey kenê ya yenê kişten ya kî yenê tepiştiş. Zengîn’î da zonayen ke Seddam Huseyîn’î zî Qûran wend û nimaz kerd la zilim zî kerd û va, zilmo ke Tirkîye de ewro yeno kerden zilmê Seddam’î ra girdêr o.
Îslamîyet nînan qebûl nêkeno
Azayê Komeleya MEDÎADER Îhsan Zengîn’î vist vîrî ke Reîscûmhûrê Tirkîye Erdogan’î herkesî zey ‘terorîst’ îlan kerd o û wina va: “Keso ke heqê xo wazeno û geyreno çima ‘terorîst’ o? Eke heqê to esto se, heqê mi zî esto, eke ziwanê to esto se, ziwanê mi zî esto. Kiltûr û hunerê mi zî esto. Rîwalo ke ez nînan wazena çima ez bena ‘terorîst’? 6-7 mîlyonî însanî qîr kenê vanê ‘ma tîya de yê’. Ma zî însanê, ma zî no welatî de cuwyenê. No welatî de heqê cuwyayişê ma zî esto.”
Îhsan Zengîn’î tewr peynî de bi vatişanê ‘zilmo ke hetê îxtidar yeno kerden îslamîyet zî însanîyet zî qebûl nêkeno’ nêrazîbiyenê xo damojna.
DÎHA/MERSIN