Endamê Komîteya Caardişî ya PKKyî û Fermanarê Qerargehê Merkezê Pawitişê Şarî (NPG) Murat Karayilanî derheqê tecrîdo ke Rayberê Şarê Kurd Abdullah Ocalanî de qisey kerd û bale ant çalakîyê ke seba wedarnayîşê tecrîdî yenî viraştiş ser.
Karayilanî va ‘Ewropa, Rojawan, Vakur, Başûr û Rojhelatê Kurdistanî de çalakîyî benî’ û wina dewam kerd: “Hetê herkesî ra yeno zanayîş ke Rayber Apo kesêko rêze nîyo. Rayberê şarê kurdî yo û no şar seba ci 10 mîlyon îmzeyî arê dayî. Nê îmzeyî teslîmê dezgehanê Ewropaye ameyî kerdiş û hetê noterî ra zî ameyî tesdîqkerdiş. Nika Îmrali de tecrîdêko giran esto. Vindetişê dagîrkerîya Tirkîya yê vera Rayber Apoyî de, vindetişê ci yê vera şarê kurdî nîşan dano.”
Karayilanî dewamê qiseykerdişê xo de wina va: “Ewro dewleta AKP û Erdogan şarê kurd û têkoşînê kurdan ra zaf tersenî. Cok ra sîstemê Îmrali erzenî dewre. Ê tersenî ke fikrê Rayber Apoyî biresî şar. Çimkî şar fikrê Rayber Apoyî ra hêz gêno. Tevger zî hêz gêno. Dewlete wazena têkoşînê Tevgerê Azadîya Kurd ra bipelçiqno. Çimkî xoverdayîşêko hîra esto; Îmrali de, heme zîndanan de, Kurdistan de, koyan de xoverdayîş esto. Çîyo ke ma wazenî ke herkes bizano, no şer o. AKP no şer de ti ehlaqî nêşinasneno. Şexsê Rayber Apoyî de hêrişê îradeya şarê kurdî kenî.”
Ganî herkes nêyî fam bikero
Karayilanî dewamê qiseykerdişê xo de qala çalakîyê ke bêrî viraştiş kerd û wina va: “Ganî vera nê hêrişanê dewlete de yê ke xo ra vanî ‘kurd’ û ‘demokrat’, bivinderî. Herkes zano, heta ke Sîstemê Îşkenceyî yê Îmrali bibo, demokrasî pê nîna. Azadbîyayîşê Kurdistanî, demokratîkbîyayîşê Tirkîya û Rojhelato Mîyanênî tîya ra derbaz benî. Cok ra nê hêrişî tena vera şarê kurdî de nê, vera ameyoxa herême de zî benî. Ganî herkes nêyî fam bikero û vera hêrişan de mîyanê çalakîyan de bibo.”
ANF/BRUKSEL