Vera heqaretanê Serokomarê Tirkîya Erdogano ke 8ê Temmuze de, Zîrweyê G20î ra dima sûka Almanya Hambûrg de, Hemserokê Pêroyî yê HDP Selahattîn Demîrtaşî û wekîlanê tepişteyî yê HDP zey "terorîst" biname kerdbi rê nêrazîbîyayîşê weçîntoxanê HDP ramenê. Na qorî zî Erdoganî rê cewab Wan ra ame. Welatijan aşkere kerdî ke îradeyê înan terorîst nîyo û vatî, “kesê ke Demîrtaşî rê vanê terorîst ê bi xo terorîst ê.
‘Hêrîşê kultur û ziwanê ma kenê’
Welatijê bi nameyê Mahmût Aydinî vist vîrî ke şexsdê Demîrtaşî de 6 milyon weçîntoxan rê vajîyayo ”terorîst”. Aydinî aşkere kerd ke îradeyê şarekî nêbeno terorîst û wina va: Ne qanûn û ne zî dewlet esto. Na sûk de terorîst çin ê, kesê ke xover danê û dawaya serbestîyê kenê estê. Şima nêşkenê înan rê vajê terorîst. Wexto ke ez şina daîreyê dewlet, mi rê vanê bi kurdî qisey meke. Ziwanê îngilizî, almanî, fransî û hwd. yenê qiseykerdiş. Çima ziwanê ma nîno qiseykerdiş. Şexsdê Demîrtaşî de ziwan û kulturê ma rê vanê “terorîst”.
‘Demîrtaş terorîst nîyo’
Recep Şekerî zî dîyar kerd ke ronayîşê komare ra na het kurd û îradeyê ci nîno qebulkerdiş. Şekerî vist vîrî ke Şêx Seîd rîwalê kamîya xo ame dardekerdiş, Demîrtaş zî rîwalê kamîya xo ame tepiştiş û qiseyanê xo wina domna: “Çîyo ke yeno kerdiş zilm o. Destûr nêdanê ke kurdî çiyekê bikerê. Ma terorîstî nîyê. Rîwalo ke tenya Demîrtaşî muxalefetê înan kerd, vistî zîndanî. Tenya Demîrtaş nê, Fîgen Yuksekdag, hemşaredar, , encumen, hemserokê sûkan zî. No yew darbe yo. Îradeyê kurdan bîyayîş yan zî nêbîyayîşê kurdan o. Demîrtaş terorîst nîyo. Yê ke ewro zilm kenê bi xo terorîst ê. Demîrtaş pêşengê ma yo. Ne sîyaset ne zî huqûq û edalet viradayê. Kam ke girêdayê înan nêbo vanê terorîst.”
Yê ke zilm kenê terorîst ê
Welatijan ra Gorgun Toner rî zî vist vîrî ke kesê ke AKP’yî nîyê rê vanê terorîst û wina va: “Yê ke zilm kenê terorîst ê. Homa înan rê nêterno. Kesê ke nêheqî û zilmî kenê terorîst ê.”
Kemal Gokçay o 70 serreyî zî aşkere kerd ke Demîrtaş parlementerê înan o û persa “Seba çi ey tepiştî” pers kerd. Gokçayî wina dewam kerd: “Vanê ke bi ziwanê xo qisey mekerê. Zilm û nêheqî kenê. Kesê ke cêrzemînan de kurdan veşnay ma ê misilman ê? Ê terorîst ê.
WAN