Bena bena.  Her kes xetayê keno. Her karî de bîyayena xetayan normal a. Xeta û şaşîyan ra tersayîş destê merdimî dano girê û rayîrê averşîyayîşî xitimneno. Mûhîmîya xo aya ke gereke merdim sey rastîyanê xo, wayîrê xetayanê xo zî bivejîyo.  Yanê xetaye bêwayîr ke bimano, çîyanê filaketan zî qewemnena.

Her xetaye xo rê yew muhatab nîşan dana û merdim ê muhatabî  de tekîlîye nano ro, meselaye çareser keno.  La eke muhatabê xetaye na derheq de ke hişka xo pê bigêyo û paya xo ra nêro war,no beno çîyêko bîn. Welhasil ez zî nêwazena bi edayê mamostatîye, dersa xeletîye û rastîye bida şima û xetayêka bîne bika. Xora derdê mi zî rastî û xeletîye musnayîş nîya. Ez wazena ke  yew xetaye eke bêwayîr/bê muhatab bimano,yan zî wayîrê xetaye eke wayîrtîya xetaya xo nêkero çîyêko senîn vejîno meydan ma naye bivînîme. Nika ma bêrê heketa xo ya muhîme ser.Yew Nûştoxê hêcayî kitabêko  mûhîm nûşnayo. Dest û paye ey weş be. Bi cigêrayîşode zor û zehmet xeylê karode baş ardo meydan. No kitab zaf ameyo wendiş û zaf ameyo ecibnayêne ke çapo diyîn ameyo kerdêne. La nê çapê diyine yê kitabî de xetayade zaf pîle ameya kerdêne. Qapaxê Kitabî de fotografê Seyîd Rizayî ser bi tirkî wina êno nûşnayene “ Tanıkların anlatımı ile Şeyh Saîd Hareketî”

Mi serî de zî vat, benê xetayî benê. La wêrekna xetayê têna bi naye bimendêne. Esas şaşîye û xetaya pîle tarîfe na xetaye de ya. Çîyêko trajikomîk,çîyêko ecêb, yanê merdim senî, kamcî het ra fam bikero şaş maneno.  Mi çend kesan ra heşnayîbî la ez bawer nêbîya. Heta ke heval/embazê min ê karî yê nêzdîyî mi rê qal kerd. Tabî hevalê mi zî Kirmanckî ser xebatan keno û o bi xo zî nûştox o. Hevalî  weşanxaneyî rê telefon akerdo û  xetaya qapaxê kitabî arda ziwan la cewabode winasî girewto ke gonîya merdimî bena ziwa.   Cewab wina bîyo “eferim, to sinav ra derbaz bîya.  Ma zî bi nê xebatî waşt ke hişê Kurdanê tarixîyî test ra derbaz bikê. Hiş û zanayîşê to yê tarixî hewl o, ma to firaz kenê.” Ê de bêrê ma biberbîme yan bihuyîme...Yanê ti fotografê Seyîd Rizayî ser nameyê Şêx Sêîdî nûşnenî no bes nîyo, ser de zî bi ney şarî test kenî… No senî test o, ti xo rê senî heq vînenî?!!.. To  bi şarî tinazî kena!!....

Yanê zaf giran ame ke şima vajê seba ke qapax de xeletîye bîya ma wendoxan û şarê xo ra uzrê xo wazenîme!! Ez vana cewabo ke şima seba pawitîşê xo dayo  şar û wendoxan rê  heqaretêko hîna pîl o.

Ma baş zanîme ke bi xeletîye çîyêko winasî bîyo.  Kitab neşr kerdêne karêko rehet nîyo. Ma tena hetê ekonomîkî ra ke bifikirîye zî barêko giran o. Xeletîya Qapaxê kitabî ver, kitab peyser aredayîş, ma baş zanîme ke seba yew çapxane û nûştoxê Kurdî malîyetêko zaf-zaf girano. Yanê wendoxî û şarê Kurdî şima tarif nêkerê zî hayîgê rewşa şima yê. La wayîrvejîyayîşê xetaye xetayêka bîn a. Şima gereke şar û wendoxan ra, seba her di xetayan cîya cîya uzrê xo biwazê.