HAMZA GUNDUZ / MA/COLEMÊRG
Hamît Tekîno ke pêşmergeyêko kehen o û qasê 9 serran vera rejîmê Sedamî de têkoşîn dayo, nika dewa Elkîkî ya ke herêma Lêwînî ya Colemêrgî de cuyeno. Tekîn 9 serran de herêmê Gilale, Xaneqîn, Mendelîna, Pizder, Qesirmarqos, Hecîumran, Rewanduz, Spîlk û Kûleka de vera rejîmê Sedamî de şer kerdo.
Hamît Tekîn û Mehmet Şerîf Tekîno ke eynî dewe de cuyeno, derheqê Yewîya Neteweyî ya Kurdan de qisey kerdî.
Tekînî va ‘sere de Mesud Barzanî û herkes ganî seba yewîye destê xo derg bikero’û wina domna: “Seba yewîye cesaretê kurdan esto û eke ma bibî yewe, ma eşkenî domananê xo nê zîndanî ra bixelisnî. Vatişê ‘ez kurd a, labelê ez do tena karê xo ra biewnîya’ şaş o. Her wextî ra zafêr lazimî bi têkoşînî esta. Ganî herkes goreyê hêzê xo beşdarê têkoşînî bibo. Homa zî yewîye ra hes keno, eke ma bibî yewe, Homa zî do hetkarîya ma bikero.”
Ganî Barzanî zî têkoşîn bido
Tekînî va ‘Ganî Barzanî zî seba yewîye têkoşîn bido’ û wina dewam kerd: “Ganî heme parçeyî bibî yewe û menfîetanê xo bipawî. Bêxera kurdan ti kes hetkarîye nêdano kurdan. Mi 9 serrî pêşmergetî kerd û ez nika xirabîya înan nêwazena. Eke ma piştî nêdî yewbînan o wext ma do heme vinî bikerî. Ocalan zî tena kewt rayîr, labelê nika bi hezaran kesî pey ci de şono. Artêşê ci estî. Cok ra heme çî bi yewîye dest pêkeno û aver şono. Lazimîya ma sewbîna kesî rê çin a. Ganî ma ko û zîndanan de domananê xo xovîra nêkerî û tena menfîetê ma yewîye û biratîya ma yî. Eke ma bibî yewe, ma hîna zaf benî bihêz. Cok ra karê ma yo sifteyîn yewîye yo.”
Heme çîyî ra ver yewîye lazim o
Mehmet Şerîf Tekîno ke eynî dewe de cuyeno zî dîyar kerd ke kura de beno wa bibo, ganî kurdî destê yewbînan bigîrî û bibî yewe û wina va: “Lazimî çin a ke ma ra vajî. Ê xora heme çîyî zanî. Tena rayîrê rizgarî yewîye yo. Raştîya xo de ê ma ra başêr zanî. Barzanîyo ke beşdarê konferansê yewîya neteweyî yê Silêmanî nêbî, ganî ewro destê xo dergê birayanê xo bikero. Wa Barzanî nêvajo ‘ez tena tîya de ya û ez eşkena heme çîyî bikera’. Bitaybetî nê referandumî ra dima lazimîya ma bi yewîye esta. Ma veng danî wa demêko rewêr yewîye awan bibo.”