Rojnameger Seyît Evranî kombîyayîşê Rûsya, Tirkîya û Îranî ser o qisey kerd û wina va: “Çar parçe de vera kurdan de hêrişî benî. Hêzê mîyanneteweyî hertim eşkenî kurdan bikerî qurbanê menfîetanê xo. Cok ra ganî kurdî yewîya xo awan bikerî. Çimkî tena yewîye kurdan pawena.” Rojnameger Mem Burhan Qanihî zî dîyar kerd ke xeyalê heme kurdan yewîye yo.
SELMAN GUZELYUZ / MA / ANQARA
7ê êlule de Rûsya, Tirkîya û Îran seba rojeva vera Îdlîbî de operasyon bêro viraştene, ameybî têhet û kombîyayîşêk viraştbî. Kombîyayîşî ra dima 3 hedîseyî qewimîyayî; Îran hêrişê qezaya Koyê kerdbî, Tirkîya hêrişê herêma Baleketî kerdbî û hêzê Esadî zî Qamişlo de hêrişê Hêzê Asayîşî kerdbî.
Nînan ra dima ame fam kerdene ke o kombîyayîş de qerarê qezencê kurdan do bêrî hedef girewtene, girîyayî. Babete ser o rojnameger Seyît Evranî va ‘o kombîyayîş de Îran mabênê Tirkîya û Rûsya viraşt û eynî wextî de hewl da ke Tirkîya vera Amerîka de sûre bikero’ û wina domna: “Kombîyayîşî ra dima Îran 3 ciwananê kurdan îdam kerdî, hêrişê Koyê kerd û hêzê Sûrîye zî Qamişlo de hêrişê hêzê asayîşî kerd. Merdim wexto ke nînan ra ewnîyeno, persê ‘gelo Tirkîya û Îran pê kerdî?’ yeno vîra merdimî.”
Evranî bale ant hêrişê Koyê ser û wina va: “Îranî bi hêrişê Koyê mesaj da Amerîka. Çimkî PDK-Î û HDK ke raştê hêrişî ameyî, cayê kombîyayîşî ke Amerîka reyde ameyî viraştene yo. Cok ra no hêriş mesajêk o û eke şerêk bibo, Îran hewl dano nê şerî teberê erdê xo de bikero. Labelê eke Îran vano qey bi kiştişî eşkeno kurdan durî bikero, o wext do zehmetîyanê girdan bicuyo. Tîya de gelo çira Îraq bêveng o?”
Çare yewîya neteweyî yo
Evranî peynîya qisekerdişê xo de va ‘hêrişê Şengalî ra dima na rey hêrişê Koyê ame cuyayene û heta nika hetê mîyanneteweyî ra ti reaksîyon nêame nîşan dayene’ û wina qedêna: “Çar parçe de vera kurdan de hêrişî benî. Cok ra hêzê mîyanneteweyî vera kurdan de dirîtîye kenî û hertim kurdan eşkenî bikerî qurbanê menfîetanê xo. Destê kurdan de tena yewîya neteweyî manena. Ganî kurdî yewîya xo awan bikerî. Çimkî tena yewîye eşkena kurdan bipawa.”
Wa kurdî vera komployan de bivinderî
Rojnameger û nuştox Mem Burhan Qanihî zî hêrişê Koyê, îdamkerdişê 3 ciwanan yê Îranî ser o qisey kerd. Qanihî va ‘dewletê herême qezencanê kurdan hedef gênî’ û wina domna: “Hêrişê Koyê û îdambîyayîşê 3 ciwanan nîşan dano ke hêzê herême vera kurdan de sucanê merdimîye kenî. Beno ke vera parçeyanê bînan yê Kurdîstanî de planê înan yê dewletanê mîyanneteweyîyan bibî. Ganî sîyasetmedarê kurdî mesajê parçekerdişî nê, yewîye bidî. Wa meseleyan baş fam bikerî û goreyê ci îzehetê ke çareserî anî, bikerî. Xeyalê heme kurdan yewîya neteweyî yo.”
MERKEZÊ XEBERAN