ERSÎN OZGUL / PÎRHA / ÎZMÎR
Aşma Muharremî ke seba elewîyan pîroz a de elewîyî roje tepişeni û hedîseyê Kerbela yad kenî. Na aşme elewîyî seba ke Hz. Huseyîn û 71 kesê bînî ke Kerbela de şehîd bîyî yad bikerî, roje tepişenî û heme çîyê xo pare kenî.
Hacibektaş Serçeşme ra Pîr Ozdogan Saglamî muhîmîya aşma Muharremî û akerdişê rojeyî ser o qisey kerd û hişyarîyê muhîmî kerdî. Saglamî qiseykerdişê xo de qala îsrafo ke beno kerd û da zanayene ke ganî herkes werdê xo yo germ bikirêşo cemxaneyî.
Saglamî bale ant muhîmîya akerdişê rojeyî ser û wina va. “Elewîyî bi hawayo tewr mutewazî rojeyê xo akenî. Labelê demê peyênan de na rewşe bedilîyaya. Êdî bi sifreyanê girdan roje yeno akerdene.”
Ma qet tenezulê înan nêkenî
Saglamî dewamê qiseykerdişê xo de wina va: “Heta vizêr ma dewa xo de sifreyanê mutewazîyan de rojeyê xo akerdêne û xizmetê xo bêmenfîet kerdêne. Labelê ewro no xira bîyo. Êdî sifreyanê luksan de roje yeno akerdene. Ma bi hawayo zaneye nêkerî zî, no bi ma dîyeno kerdene. Hewl dîyeno ke ma asîmîle bikerî û ma bawerîya ma ra durî bikerî. Eke ma seba akerdişê rojeyî şonî cemxane, o wext ganî ma werdo ke keyeyê ma de pewjîyeno zî xo reyde bîşêrî. Ma qet tasa dewlemendanê dinya de werd nêwerdo û ma do nêwerî.”
‘Huseyînê ma vindetişê ma yo’
Saglamî va ‘Îmam Huseyînî nêwaştêne ke seba ey 12 rojî roje bêro tepiştene û bibermîyo’ û wina dewam kerd: “Fikrêkê ci yê winasî qet çinêbi. Ganî elewîyî zî heme cayê cuya xo de nê vindetişî û na xete esas bigîrî. Wexto ke Yas-i Muharrem yeno vatene, ganî ma tena vêşan mendene û roje tepiştene reyde sînordar nêmanî. Îmam Huseyîn Kerbela de meseleye dinya û merdimîye yo. Ganî ma tena 12 rojî nê, heme cuya xo de wina hereket bikerî û bicuyî. Marîfet tîya de kerdene nîyo, mîyanê cuye de kerdene yo. Ma bi hawayo baş zanî ke hertim dinya de Yezîdêk esto. Labelê ganî hertim Huseyînêk zî bibo. Huseyînê ma yewîye û vindetişê ma yo. Yanî pîvanê ma yî. Huseyînê ma ewnîyayîşê ma yê cuye û tarzê cuyayîşê ma yo.”