Serê koyê Şengalî de cuyîyayîş qet rehet nîyo. Xeylê zor o. Maneno cuya gerilla. Mabênê cuya gerila û serê koyê Şengalî de zaf ferqe çîn a.  Şengalijî serê koyê Şengalî de şert û mercanê cuye ya girane de cuyenê. Îmkanî zaf şenik ê. 

Nika kî zimistan o. Zimistanê koyan cîya yo. Zimistanê xo raşt zimistan o. Qet leqa xo çîn a. Tawo ke êno tam êno. Mordem heta zereyê astikanê xo hîs keno. Mezgê astikanê mordemî cemedîno. Çend roje yo koyê Şengalî de zimistanî xo tam musna ma. Heqa xo ya heta aşma Mijdare kî wext da ma. Va: Tedarîkê xo bicêrê. Va: Eke ez bêrî xirab êna. Ma zaf goş nêkuya pa. O kî ame yewa henêne nayê binê goşê ma ra ke. Va: Ha şima rê şima goş nêkuyenê pa ha. De weş o! 

Êê pey na şamare ma amayme bi xo. Senî ke va û vartîşê Koyê Şengalî vinet ma kî dest bi ci kerd. Ma hîrê çar embaz îme. Va û vartîş vineto la xezika mevinetênê. Çûnke serdode henên esto ke destê ma nêcêne ke ma bigurîme. Rind o kulindade ma esta, ma xo erzenîme virana aye xo tayê keme germ reyna ême ser karî. Ma heta perojî xo ver ro da. Ma vêşanîme. Kebanîya ma Xezale ma rê werd kerdo hazir. Senî ke aye va:

-Hevalno werd hazir o.

Ma pêro pawayê ci bîme, senî ke ma nê vateyî heşnayî ma ca de kar caverda ma xo êşt zereyê kulinda germin e. Destê ma bîyê sung û siya. Fiş fiş a ma ya. Ti vana qey koroya fiş fişay a. Derdê ma werdî ra zîyaderî germ o. Ma pêro pîya dormeyê sobayê de kom bîme. Ma hîna dest bi werdî nêkerdbî dayika Kine çêverê kulinda ma ra asaye. Û bi vengê xo yê geşê her demî va:

-Ma bi xêr dî.

Ma pêro pîya bi heman germinîye cewabê aye da:

-Xêr bi silamet daka Kinê.

Ma masaya werdî ser o ca musna aye. A ke nîşte ro ma kî reyna nîştîme ro. Zerreyê çimanê daka Kine yê keskan huyeno. Çimê keskî û rûyo qemer kî çiqas şîkîyenê yewbînî. Senî ke wazenê vajê tu manayê xemî, derd û kulan, bêhêvîye çîn o. Wext wextê hêvî viraştişî yo. Hêvîyê kenê vila. Nê dem û dewranî de jîhatîbûnade zaf giranbuha ya. Her kes nêşkîno. Ci rê şoreşgerbîyene gerek a. Na het ra qet qusur çîn o daka Kine şoreşger a. 

Cayê ma germ o. Pey hende cemîdîyene ma bîme germ. Laşa ma bîya sist. Ma hem werd weme hem qisey keme. Xoşebera daka Kineyê kî xoşeber a hanê. Ti vana fek ra hemgimen herekîyeno. Weş qisey kena. Tawo ke qisey kena mordem ci ra çîyan museno. Tawo ke qala çîyanê kanan kena zaf weş a mi şono. Daka Kine qet nêwendo la a kamil a. Cuye wenda û bîya kamile. 

Ma ke nata bota tayê qisey kerd, vate ame ser halê Êzdiyan. Xora pêro munaqaşeyên siyasî ser rewşa Şengal û Şengalijanê. Her embazêk çîyê va. Heta a vîste daka Kine bêveng goş nayêne munaqaşeyan ser o. Tayê ke nîya goş na ser vate guret û va:

-Şima zanenê halê zaferîyê Şengalijanê ma no yo; ginayê behrî ro xo bi mar gureto. Mar roje be roje înan jahr keno. Derba mergî çi taw pirodo kifş nîyo. 

Ma pêro bêveng û bêvaj mendîme.