YPG’ê di daxuyaniya xwe de ragihand ku berxwedana Kobanê di roja 85’an de didome û wiha got: “Êrîşên çeteyên DAIŞ'ê ku bi armanca dagirkirina Kobanê hatine destpêkirina di roja 85’an de dewam kirin. Pêşveçûna hêzên me li navenda bajêr dewam dike. Herwiha komên çete jî bi avêtina topên hewanê hewldidin encam werbigrin.”

Operasyona YPG´ê dewam dike

Derbarê şerê li eniya rojhilatê Kobanê de YPG’ê wiha got: “Li eniya Rojhilat di navbera hêzên me û komên çete de şerekî dem kurt pêk hatiye. Di vî şerî de hejmara kuştî û birîndarên çeteyan nehatiye zelalkirin.” YPG’ê destnîşan kir ku di şerê 24 saetên dawî de 3 noqte ji çeteyên DAIŞ’ê hatine paqijkirin û wiha got: “Operasyona hêzên me li eniya başûr jî bênavber dewam dikin. Hêzên me li vê eniyê, li hemberî hin noqteyên ku çeteyan dagirkirine êrîş pêk anîne. Di encama vê êrîşê de 3 nuqte ji çeteyan hatine paqijkirin. Ji ber ku lêgerîn û lêkolîna li herêmê dewam dike, encama zelal a operasyonê nehatiye zelalkirin.”

NAVENDA NÛÇEYAN