YPG`ê der barê mijarê de daxuyaniyeke nivîskî weşand û di daxuyaniya ku li ser malpera fermî ya YPG`ê hate weşandin ev tişt hatin gotin:" Gelê me yê hêja, welatiyên herêma Til Berekê yên bi rûmet, vaye dîsa me bi hevre gavek ber bi azadiyê ve avêtin, azadiya hemû gelê Sûriyê. Me bajarokê Til Berekê yê berxwedêr ji destê çete, zordest û tundrewên biyanî yên ku dûrî çand û baweriyên me ne, rizgar kir. Komên çete bajarê Til Berekê kiribûn baregeha terorê û welatiyên herêmê kuştin û revandin, her wiha ji vê herêmê êrîşên bi erebeyên bombekirî li dijî herêmên din pêk dianîn. Şêniyên herêmê ji bo ku em wan ji  zilma van komên çete yên ku ji bo berjewendiyên hin aliyan û dûrî pîvanên neteweyî û mirovî, kiryarên hovîtî pêk anîn rizgar bikin, bang li me kirin. Yekîneyên me jî bi alîkariya Eşîrên Ereb ên herêmê yên azadîxwaz û bi rûmet ji bo rizgarkirina herêmê tevgeriyan û herêm rizgar kirin."


Til Berek li benda we ye
Daxuyaniyê wiha dewam kir:" Welatiyên Til Berekê yên bi rûmet, eşîrên azadîxwaz, vaye bajarê we li we vegeriya, bi alîkariya we û bi keda zarokên we ji komên çete û tarî hate rizgarkirin. Niha dema weye ku hûn erkên xwe yên dîrokî pêk bînin û bajarê xwe biparêzin û birêxistin bikin da ku bibe nimûneya berxwedan û rûmetê." YPG`ê di daxuyaniya xwe de ji welatiyên Til Berekê yên ku ji aliyê çeteyan ve hatine koçber kirin xwest ku vegerin malên xwe û wiha dewam kir:"Em bang li hemû welatiyên rêzdar dikin ku vegerin malên xwe, me bajar ji teqemenî û mayinan paqij kir. Em bang li we dikin ku hûn meclîs û rêveberiyên xwe yên cuda û hêzên xwe yên parastinê ava bikin."

Berpirsiyariya netewî
Fermandariya YPG`ê daxuyaniya xwe wiha bi dawî kir:"Hûn xwediyê bajêr û herêmê ne, ev bajarê we yê azad dîsa vegeriya destê we. Li pêşiya we berpirsyariyên mirovî, neteweyî û exlaqî hene ku hûn gelê xwe ber bi azadiyê ve bibin û ji bo her kesî jiyaneke bi rûmet pêk bînin. Em dibêjin, bi hevre ber bi pêşxistin û parastina bajêr û herêmê, yekîneyên me, Yekîneyên Parastina Gel (YPG) dê ji niha heta ku hûn bi xwe karibin xwe biparêzin, bi hemû derfetên xwe alîkariya we bikin." YPG´ê û YPJ´ê roja 22`ê Sibatê operasiyoneke lidar xist û bajarê Til Berekê û herêmên derdorê ji komên çete rizgar kirin.

ANHA/QAMIŞLO