Bajarok aram bû
Di daxuyaniyê de hate destnîşankirin ku armanca YPG'ê ji hemleyê ew bû ku çeteyan belav bike û wan ji erdnîgariya herêmê dûr bixin da ku xetereya wan li ser herêmê nemîne, her wiha hewldanên wan ên derxistina tevliheviyê di navbera pêkhateyên herêmê de, vala derbixin û Til Berek û gundên wê ku bûbû navenda çeteyan paqij bikin.
Di berdewama daxuyaniyê de hate bibîrxistin ku YPG'ê beriya niha dabû xuyankirin ku pêwîste gelê herêmê parastina aramî û ewlekariya bajarê xwe bikin û wiha hat domkirin: ''Armanca me ya sereke, parastina herêmê û gelê wê ye. Her wiha pêşxistina biratiya gelan û jiyana hevbeş a hemû gelên herêmê.''
´Me erka xwe pêk anî´
Di daxuyaniyê de hete diyarkirin ku hêzên YPG’ê erka xwe ya paqijkirina bajaroka Til Berek ji hemû çeteyan û parastina aramiya wê, pêk aniye û wiha hate domandin: ''Li ser daxwaza serokeşîr û rûspiyên herêmê û ji bo parastina biratiya dîrokî ya gelê Kurd û Ereb, me hêzên xwe ji bajaroka Til Berek kişandin. Em hêvî dikin ku şêniyên bajar vegerin malên xwe, rêveberiya bajarê xwe bikin û rê nedin ku çete derbasî bajêr bibin.''
Banga hişyariyê
Di berdewama daxuyaniya xwe YPG bibîrxist ku eger careke din çete derbasî bajêr bibin, dê YPG careke din hemleyê bide destpêkirin û derbeyên giran li navendên çeteyan bixin û rê nedin wan ku careke din kom bibin.
Di daxuyaniyê de ev hişyarî hate kirin: ''Bila hemû kesên ku piştgiriya çeteyan dikirin û aramiya herêmê tevlîhev dikirin, baş bizanibin ku eger careke din piştgiriya çeteyan bikin, dê bêne darizandin.'' Di daxuyaniyê de bang li hemû aliyan hate kirin ku bi rihê berpirsyariyê tevbigerin û piştgiriya berxwedana rewa ya li dijî çeteyan û êrîşên wan, bikin û daxuyanî wiha pêde çû: ''Bila her kes wateya biryara me ya derbarê rawestandina çalakiyên leşkerî di sînorên heyî de baş zanibin û têbighêjin ku ev biryar ji baweriya me bi berpirsyartiyên me ya dîrokî hatiye. Biryara me bingeha xwe ji jiyana hevbeş û biratiya gelên herêmê pêk hatiye.''
Banga vegerê kir
Fermandariya YPG'ê di dawiya daxuyaniya xwe de bang li şêniyên Til Berek kir ku vegerin û soz da ku YPG'ê dê tu carî wan li ber çeteyan bê parastin nehêle û dema bê xwestin dê erka xwe ya parastinê pêk bîne.
Di dawiya daxuyaniyê de YPG'ê bang li hemû pêkhateyan kir ku li derdora hêzên YPG'ê ku bûye amûra misogeriya aramî û jiyana hevbeş, azad bin û piştgiriya xwe pêşkêş bikin.
ANHA/QAMIŞLO