BÊRÎTAN SARYA /ANF / DÊRA ZOR
Şorişê Rojawan her roje gamêka bîne nizdîyê serkewtişî beno û no şoriş mîyan de her bawerî û nîjadan ra merdimî ca gênî. Şorişê Rojawanî no het de xusûsîyetê enternasyonalî nîşan dano.
Şerwanê ke vera çeteyan û zîhnîyetê kehenperestî de têkoşîn danî ra yewe zî Serhat Baya yo. Serhat Baya 6 aşmî verê Fransa ra beşdarê YBŞyî bî û vera DAIŞî de têkoşîn da. Labelê tena bi nêyî sînordar nêmend û beşdarê Hemleya Firtineyê Cizîrî zî bî. Bayayî qisey kerd û qala beşdarbîyayîşê xo kerd.
Bayayî va ‘YPG dîn û nîjadê ti kesî ra nêewnîyeno û heme merdiman DAIŞ ra paweno’ û wina dewam kerd: “Seba mi hetkarîya êzidîyan kerdiş, merdimî serrîberz keno. Çimkî êzidîyî hetê çeteyanê DAIŞî ra zaf ameyî bêzarkerdiş. Sey enternasyonalîstêk hetkarîye dayîşê înan seba mi zaf muhîm bî.”
Seba hemleye agêrayîşê xo taloq kerd
Bayayî dewamê qiseykerdişê xo de wina va: “Wexto ke ez mîyanê YBŞyî de bîya, embazê min yê ke mîyanê YBŞyî de bî, heme agêrayî. Ez zaf tesîr bîbîya. Mi qerar girewt ke ez tayêna tîya de bimana. Mi waşt ke ez biagêra Rojawan û Dêra Zor de zî şer bikera. Seba ke beşdarê hemleya peyêne bîya, ez zaf kêfweş a. Ez xirîstîyan a û sey xirîstîyanêk vera çeteyanê DAIŞî de hetkarîye dayîşê êzidîyan seba mi muhîm o. YPG ereb, kurd, tirkmen û kamcîn dîn ra beno wa bibo, herkesî DAIŞ ra paweno. Reyna heqê cinîyan paweno. Mi tîya de merdimê cesurî nas kerdî û ez kêfweş a.”