Verra sereştişanê barbar û minafiqanê DAIŞ xoverdayişê Kobanê didi aşmî pey xo de virada. Çeteyê ke 15’ê Îlonî ra tepya hêrişê Kobanê kerdî rewna ra poşman biyê. Çi ke nê barbaran verr hendayî xoverdayişê gird nê pawit. Înan va qey Kobanê zî do zey cayanê bîn biterso û teslîm bibo. Yeno vaten ke çeteyî rayveranê xo rê nêrazîbiyen damisnenê, îsyan kenê û persa “şima ma ardo kotî, no cayê do senîno?” kenê. DAIŞ’o minafiq rewna ra herbê-lejê Kobanê vinî kerd la nêwazenê xo peyser biancê. Vanê ‘eke ma peyser bianciyinê îtibar, şan û qarîzmayê ma do biqediyo. Çi ke nê minafiqî zanê ke Kobanê de binkewtişê înan, Efrîn de, Cizîr de, pêrokîn rojawa de binkewtişê înan o. Wexto ke binkewê zî nêresenê emelanê xo, pêrokîn omid, proje û planê ci veng vejenê. Nayî ra ebi pêrokîn qûwetê xo kewtê hewldayinê peynî yê vistişê Kobanê. La her ke wext ravêreno DAIŞ gonî keno vinî. Tenya aşma mavêna 15’ê îlon û 15’ê cotmehe de 1294 çeteyî amey kişten. Pey coy zî her roj bi desan çete hetê qûwetanê pawiten YPG-YPJ amey kişten. Kobanê bi saya qûwetanê pawiten gam bi gam nezdiyê serbestî beno.

Qeleyê xoverdayiş Kobanê rewna ra serkewto. Pêrokîn dinya zî na raştî wina qebûl keno û qûwetanê pawiten gipta keno. Xoverdayişê Kobanê de en vêşî zî ‘Qûwetê Pawitenê Ceniyan’ YPJ hayrê herkesî ancena. YPJ çeteyan ra piya dersê do gird da herkesî. Damisnayiş ke cenî camêrdan ra zî vêşî rind û ebi qerardarî şenê herb bikero, taktîk û stratejiyê lej ronê û derbeyî nayrê dişmenanê xo ro. Nay ra; Cenî, siyasetmedarî, niştox, akademîsyen û hunermendî vinderdiş û îradeyê YPJ silamî kenê û anê ziwan ke qûwetê pawitenê ceniyan serva serbestiya pêrokîn dinya herb kenê. Va yê YPJ pêrokîn dinya de ravêreno. Helbet no îmaj û kamî ebi dayişê bedelanê giran de roniya. Xortanê Kurdan ra piya bi desan ceniyanê Kurd raya pawitişê Kobanê de ganê xo feda kerdî. Ceniyê Kurd bi cesaret, îrade, zanabiyiş, qerardarî û rihê fedaîyane verra çeteyan de vindiyay û nêviraday ke ê ravêrê sûk û îşgal bikerê. Nê lejwananê azadî ra jû zî ceniya fedayî Arîn Mîrkan bî.
5’ê cotmehe, roja 20. yê pirodayişan de, kiştê başûr û rojhelatî de pancas noqteyan de pirodayişê girdî qewimî. Çeteyan çormeyê tepeyê Miştenûr ke Arîn Mîrkan û imbazê ci mewziyanê vernî de bî girot. Çeteyan ebi tank û tifinganê giran hêrişê no tepeyî kerdî. Arîn ebi imbazanê xo ra piya pêrokîn roj verra nê barbarê ke feq dê ci ra axû rijeno da piro. Peynî de taqîpkara Zîlan ganê xo de bombeyî kerd bar û şî hetê çeteyan de teqîna. Ebi no nûmayişê fedayî yê Arîn Mîrkan barbarê ke şoq bî û derbeyê girdî werdî nêşay dekewê sûk. A roj Kobanê serkewtibi û gerantî bi ke Kobanê do nêkewo, çi ke, ewja de hezarî Arîn Mîrkan estbî. Xora imbazanê Arîn pey ci de jû damûstayîn day û aşkere kerdî ke; ceniyê Kurd ê ke xoverdanê hewna qiseyê xo yê peynî nêvatiyê.! Raşto Arîn rihê xoverdayiş bî. Çi ke Arîn Mîrkan qedero ke Kurdistan’î rê ame ferzkerdiş û bê-heqîqetiya dinya rind zanabî. Riho ke ay rê qûwet da û vist ke nûmayişê do wina virazo zî no zanayiş bi.
Kurdistan do serkewo çi ke bi des hezarî keyne-ceniyê ci yê zey Arîn Mîrkan estê. Nê ceniyan ra jû zî Kader Ortakaya bî ke mesajê Arîn Mîrkan raşt wend û zey taqîpkara ay sînoran ravêrna verê xo da cayê adir, qeleyê xoverdayiş. Kader a ke tewrê govenda Arîn bî ebi vatişanê “No lej tenya yê Kobanê niyo, yê pêrokîn merdimîyo. Ez wazena ke wa pêrokîn însanî zeypê û azad weşî bikerê. Serva-qandê nay zî gerek tekoşîn û herb bîro dayiş.” veng da pêrokîn wijdanan. Kader Ortakaya a ke azadiya ceniyan vinderdiş û kamiya YPJ de dî û verê xo da hetê Kobanê pey xo de na mesaj virada; “Gerek ma her cayî açarnê Kobanê, çi ke azadî  Kobanê ra ravêriyeno.
 YPJ; Arîn Mîrkan, Kader Ortakaya û îradeyê rêxistinkerdî yê bi hezaran ceniyan mijdaniya Kurdistana azad danê. Tenya ma wayrê xoverdayiş û wesiyetê înan bivejyê.