Ewro roja zabiyîna Rayver Öcalan’î ya. Şarê kurd zabiyîna ey zey roja dayikbiyîna xo vînenê. Çi ke ebi raştiya Rayver Öcalan’î serva-qandê Kurdan kêberê mîladê newî abiya. Verra polîtîkayanê qirkerdişê Kurdan serhewedayiş destpa kerd. Kurdê ke ver dê fekê qirkerdiş xo xelesnay û nika biyê şarê tewr quwetîn yê dinya.
Kurdê ki resyayî merhaleyê ‘xobiyîn’ roja ewroyî de endî polîtîkayanê çinîkerdiş ra ray nêdanê. Se serrîyo him qûwetê mavênnetewî, him zî yê heremî hewl day ke Kurdan qir bikerê, asîmîle bikerê. Dewleta tirk serva ke Kurdistan bê însan bikero her çî kerd. Bi milyonî Kurdan goç kerd. Bi hezaran dewan da ver adir, veşna. Xozaya Kurdistan talan kerd. Bi hezaran kesî qetil kerd.
Rixmê pêrokîn hewldayinan şarê Kurd bi rayverîna Öcalan’î de xoverda û ewro xo resna netewê da demokratîk. Rayver Öcalan’î bi polîtîka, hemle, felsefe û stratejiyê rast herzewbîn bi îrade û cesaretê gird Kurdan resna roja ewroyî. Cok ra Kurdî zabiyayişa Rayverê xo, zey zabiyayişa xo vînenê û slogana ‘bê serok ciwyan nêbeno’ berz kenê. Ceniyê Kurd zî serbestiya xo deyndarê Rayver Öcalan’î yê. Çi ke demo ke herkesî va cenî nêşenê kêberê keye ra vejyê teber û zey kole hesibnay, Rayver Öcalan’î ceniyan ant zerreyê tekoşînî û raya serbestî damisna.
Rayver Öcalan tewr pêrokîn hewldayinê haştî û çarekerdinê meseleya Kurd 17 serriyo şert û mercanê giran de zereyê zerya de tecrît de yeno giroten. Rixmê nê şert û mercan Rayver Öcalan’î demê çarekerdin da destcikerdin û rijnayişê gonî vinderna. Tenya şarê Kurd nê, dewleta tirk û şarê Tirkiyeyî zî deyndarê ey ê. Endî kesê zanayê dinya, fîlozof û siyasetmedarê dinya anê ziwan ke Öcalan mîmarê haştî û çarekerdin o. Hewildayinê Rayver Öcalan’î tenya serva çarekerdinê meseleya Kurd niyê. Paradigma, siyaset û projeyê ke Rayver Öcalan ravêrbeno serva xelesnayişê pêrokîn şaranê rojhelatê miyanî yê. Rayver Öcalan’î ispat kerd ke koledarî û kiştiş qederê rojhelatêmiyanî niyo. Û îşaretê federasyon ya zî kordînasyonê şaranê rojhelatê miyanî keno. Nayî ra fikir, felsefe û siyaseta ke Rayver Öcalan ramnenê tenya serva Kurdan nê garantiyê pêrokîn şaranê rojhelatê miyanî yo.
Nika pêrokîn dinya behsê qewmê Öcalan’î keno. Çi ke eslê xo de zabiyîşê raştey yê Kurdan netîceyê hewldayin û xoverdayişê Rayver Öcalan’î de bî. Nayî ra tenya eştişê sloganan nê, raştî de gune şarê Kurd zî hewl bido felsefeyê rayverê xo fehm bikerê û cewabê raştey bidê ey.
Roja dayikbiyîna Rayver Öcalan’î Kurdan rê, pêrokîn şaranê bindestan rê û pêrokîn ceniyan rê bimbarek bo.