Serekkomarê dewleta tirkî Erdoganî demê peyênan de têkilîya xo bi dewleta Almanî bihêz kerda û serran ra dima do 28 û 29ê êlule bi hawayo fermî Almanya zîyaret bikero. Zafaneyê muxalefet û raya pêroyîya Almanya, nêwazenî Erdogan hawayo fermî bêro meyman kerdene.
Erdogan zî wazeno nê zîyaretî bikero firsend û goreyê xo bixebetno. Ame musayene ke şarê Almanya nêwazeno Erdogano ke hewl dabi wextê referandumê qanûnê bingeyî yê 16ê Nîsane û weçînayîşê 24ê Hezîrane de qedexeyo ke seba ey û wezîranê ci rê ronîyabi, bişikno bêro Almanya.
Goreyê cigêrayîşo hetê şîrketê cigêrayîşî yê Insa ra ame kerdene, se ra 65,8ê almanan nêwazenî Erdogan cayêko akerde de tirkan rê qisey bikero. Almanê ke çîyêko winasî ra vanî ya se ra 14 o û se ra 19ê almanan zî vato ‘ez nêzana’.
Erdoganî cewabêk nêgirewto
Hewteyo bîn medya de vejîyabi ke Erdogan do 29ê êlule de Koln de bi hetgiranê xo reyde bêro têhet. Na çarçewa de Koln de pêvînayîşî ameybî kerdene. Ame musayene ke salonanê girdan hîna cewabêk nêdayo AKPyîyan. Selahîyetdarêkê almanan vato ‘Ma tena seba pêvînayîşanê dewlete Erdoganî dawet kerdo, seba pêvînayîşanê taybetan nê’. Seke yeno zanayene Erdoganî 2008 de Koln de hetgiranê xo rê qisey kerdbî û vatbi: “Ti kes nêşêno şima ra derheqê asîmîlasyonî de çîyêko baş hêvî bikero. Çimkî asîmîlasyon sucê merdimîye yo. Ganî şima nêyî wina bizanî.” û nê vatişê ci ser o xeylê munaqeşeyî ameybî kerdene.
ANF / BERLÎN