Zangehê Çewlig, jew cayo ke, wendekarî tekoşînê heq û azadiyan danê yo. La kerdenê no zangehî, zey kerdenê girotxaneyanê. No zangeho ke 30 hezar wendekarê ci estê, hetê rektorî açarniyayo girotxane.
Ver kêberê zangehî ra, wesayîtê Akrep, yê TOMA, polîs û otobusê ci kêm nêbenê. Herzewbîn çormeyê zangehî bi 2 metre derabeyanê hesingî ameyo giroten. Bi no hewayî zangeh şibeno girotxane. Goreyê zonayişan çormeyê zangeh do bi têlan zî bîro giroten. Dekewtişê kampusê zangehî de tûrnîke (cayê geyrayiş) roniyayê. Ver nê tûrnîkeyan de esker û polîsî nobed gênê û destûr nêdanê wekîlê sûk zî dekewê zereyê zangehî.
No zangehî de wendekarê kurd zî hedefê rektorî de yê. Verriya nika, xeylê wendekarî raştê cezayanê giran û kêfî amey. Wendekarî rîwalê ke tewrê şahiya Newroz biyê, rîwalê ke tewrê çalakiyan biyê raştê cezayan amey. Xeylê ci zangehî ra dûr eştiyay. Xeylê ci zî raştê cezayê dîsîplîn amey. Rektor û îdareyê zangehî zî zey midûrê girotxaneyan hereket kenê, bi esker û polîsan wendekaran tehdît kenê.
DÎHA/ÇEWLIG