Hîkayeyanê Şeyda de merdim nêşikîno yew ca de bimano. Tim gêreno. Koyan ra gêreno, dewan ra gêreno. Ruh û rîyê merdiman ra gêreno. Çekuyanê aye de merdim beno merdim û xo nas keno. Kamîya xo, welatê xo vîneno.
Hîkayeyanê Şeyda de merdim tim germinîya zerrî û wijdanî vineno. Yew nuştoxe qehremana xo rê wina dejena. Zerrîya xo wina zîz kena û wina wayîr vejîna. Merdim pêro qehremanan de nuştoxe vîneno. A xo qet nênimnena. Şeyda ruhê pêro qehremananê xo de ya. Înan de bermena, huyena, tersena û yan zî omid kena.
"Çimê xoyê girsî kerdîbî vît aye de nîyadayêne. A kî ey ra tepîya nêmendîbî. Aye kî çimê xo yê sîyayê girsî vîtê ey kerdîbî. Nîya demêk yewbînî de nîyada. No dem çiqas bî aye qet nêzanit. Sanîya bî, deqa bî? Saete bî? Çiqas ontîbî aye nêzana. Teyna no zanitêne ke aye rê zaf derg ameybî. O ame xo, aye de peşmerîya, bi vazdayîş şî resa cendermanê bînan." (Zeman Sey Fekê Kardî Bî, r. 141)
Û çekuyê Şeyda domanîya ma ra, dewanê ma ra ma rê vengan anê. Gelo şima vengê huyayîşê domanan anê xo vîr? Hîkayeyanê Şeyda de domanî tim der û dormeyê şima de yê, şima înan de rayîr şonê û vengê girpayîşê zerrîya înan şima rê zaf nas yeno. Tewr çîyo weş kî cinî û camêrdî çekuyanê aye pîya û têdûşt de xemelnenê.
Raywanîya Şeyda raywanîya cinîyanê kirmancan a û ez omid kena ke na raywanîya pîroze de rayîr û rayîrwanê ma bizêdîyê. Wa Şeyda bi zerrî û çekuyanê xo bizêdîyo, vila bibo...
BEDRÎYE TOPAÇ/AZAKÎ.NET