Serragêra qetlîama Şengal’î de zî şarê Kurd raştê qetlîamê newî amey. Verra hardê pawitenê medya hêrişê hewayî yê artêşa tirk 24’ê Tîrmeh ra heta na het ramenê. Teyareyanê tirk 1’ê Tebaxî de zî bombe varnay dewa Zergelê ya ke mintiqeya Qendîl de ya ser û 8 dewijan qetilkerd.
Didi aşmanê peynî de bi organîzeyê, ya zî bi destegê dewleta tirk verra Kurdan panc qetlîamê gonîn viraziyay. Startê qetlîaman 5’ê Heziran de mitînga gird yê Amed de ame dayen. 25’ê Hezîran’î de Kobanê de qetlîamê da gonîn viraziya û bi desan kesan weşiya xo kerd vinî. Qetlîam netîceyê polîtîkayanê şaş û piyakariya AKP û çeteyanê DAİŞ de viraziya. Şarê Kurd zey sucdarê sifte na qetlîam ra AKP mesûl girot. Çi ke hikûmet roja sifte ra heta na gam her hetî ra paşt da çeteyan. Wexto ke hewna dirbetina Kobanê gonî da de jû xebera bîn yê qetlîam zî Pirsûs ra amê. Piyakariya DAİŞ-AKP 20’ê Tîrmeh’î de qezaya Riha Pirsûs de gencê federasyonê komeleyê gencanê sosyalîst kerdî hedef. Qetlîam de 32 gencanê SGDF weşiya xo kerdî vinî.
Dewleta qetilkar ya ke gonîrijnayin ra mird nêbî tewr peynî de zî teyareyanê herb ra bombeyê qazan, roketî rijna dewa Zergelê ser, banê dew erdî ra kerdî jû. Rixmê nayî serva-qandê ke sucê xo binimno îdia kena ke yê ke amey kişten sivîlî niyê, gerîla yê. La pêrokîn delîlê qetlîama sivîl werte de yê. Tewr peynî de heyetê HDP şi dewa Zergelê û bi çimandê xo şopê qetlîama sivîl dî.
Dewa Zergelê zey dewanê Bolê, Bokrîska Lewcê Suredê mintiqeya Qendîl de, zey cayê da cinnet a. Zergelê de awa çem ravêrena û çormeyê ci de baxçe û bostanê fêkiyan estê. Verriya qetlîam huwen-kenê domanan berzê asîmanan bî. La nika bêvengiyê da xorîn esta. Zergelê bi desan serriyo hedefê polîtîka û hêrişanê dewletanê Irak, Îran û Tirkiye de yo. Vera Zergelê hêrişa sifte-ewil serra 1963 de hetê dewleta Irak viraziya. Rejîma Irak bi seyan esker, bi top û tifingan hêrişê Zergelê kerd, cenî doman-qeçekan ra piya desan welatijan qetil kerd û bi desanê ci zî kerd dirbetin. Rejîma Irak û Saddam Hüseyîn’î hetta serranê ‘90’î verra Zergelê hêrişanê xo dewam kerdî. Zilma Saddam Hüseyin’î 1997’î ra tepya dewleta tirk dewr girot. Na serr de artêşa tirk bi tanq û topan heta Zergelê şî û bi desan kesan qetilkerd. 2001’î de zî bi teyareyan bombevaran kerd û qetlîam viraşt. 2007’î-2011’î de zî teyareyê herb yê tirk fina-reyna serva ke qetlîama newî virazo verê xo day hetê dewa Zergelê.
Dewleta tirk bi zanabiyen Zergelê kerd hedef. Çi ke wazena ke Qendîl û pêrokîn mintiqeyanê gerîla tol-veng bikero. Çi ke AKP qerarê herbê topyekûn giroto û kîmyasal ra piya wazena pêrokîn ray û raybazê qilerîn-leyminî kar biyaro. Cok ra him başûr de, him bakûr de hewl danê ke sivîlan dewanê xo ra koçkero. Nayî ra nika xeylê cayan de adir da birr-daristanan û xozaya Kurdistan veşnena.
Heta bîn ra verra terora dewleta tirk nûmayişê gerîlayan zî dewam kenê. Badê çend serran reyna-fina cenazeyê eskeran yenê. Sermiyanê hereketê serbestî yê Kurd aşkere kerdî ke gerîla heta nika hewna destê xo nêeşto tifing ser û heqê xo yê misîleme ca nêardo. Û veng danê Kurdistanijan ke pozîsyonê xo pawiten de xoverdayişê xo gird bikerê. Winî ayseno ke na herb do neyra tepya hewna gird bibo. Bi nê polîtîkayanê faşîzan AKP xo teşîr kena û prestîjê xo yê peynî zî vinî kena. Çi ke endî civakê tirkiye bi xo zî herb nêwazenê û vanê; yê ke qerarê herb gênê wa sifte doman-qijanê xo birişê. Babeda bîn zî naya ke endî bi vengê berz yena qiseykerdin; him qada siyaset de him zî kuçeyan de yeno vaten ke no herb, herbê welat niyo, herbê îxtidara Saray o. MHP ra tepya kes nîno na kaya qilerîn yê AKP. Çi ke endî şarî herb nê haştî, hizûr û rehetî wazenê. Serva-qandê nay zî AKP mecbûra ke fina şiro hetê Rayver Öcalan’î het. Çi ke tenya Rayver Öcalan şeno no herbî vinderno.