Dayîkê Şeme ke serra 1995î ra nata çalakîye virazenî û aqubetê vînîbîyayeyanê xo pers kenî, no hewte reya 700. roniştî. Xeylê parlamenter, rojnameger û temsîlkarê rêxistinan beşdarê çalakîye bîyî. Polîsan hêrişî dayîkan kerd. Ewropa de xeylê cayan de çalakîyê piştîdayîşî ameyî viraştene û hêrişê dewleta tirkî ame protesto kerdene. Dayîkê Şeme no hewte reya 700. Rasteyê Galatasarayî de roniştî û aqubetê vînîbîyayeyanê xo pers kerdî. Sere de Stenbol, Amed û xeylê cayanê bînan de çalakîyî ameyî viraştene. Bajaranê Ewropa de zî çalakîyê piştîdayîşî ameyî viraştene û bi seyan kesî beşdarê çalakîyan bîyî. Bajarê Amsterdamî yê Hollanda, bajarê Stockholmî yê Swêdî, bajarê Brukselî yê Belçîka, bajarê Mannheîmî yê Almanya, paytextê Fransa Parîsî, Swîsre û sewbîna cayan de çalakîyê piştîdayîşî ameyî viraştene. Parlamenter, rojnameger, temsîlkarê xeylê dezge û rêxistinan beşdarê çalakîyan bîyî û polîtîkaya vînîkerdişî ya dewleta tirkî ke bi serran o domîyena, şermizar kerdî. Çalakîyan de posterê kesanê vînîbîyayeyan ameyî kiriştene û seba piştîdayîşyewbînanî veng dîya herkesî. Reyna çalakîyan de hêrişê dewleta tirkî zî ameyî protesto kerdene. Çalakîyan de Parlamenter Zeynel Ozenî qisey kerd. Ozenî va ‘wareza û lajê xalê mi zî ameyî vînî kerdene û ma cayê mezelanê înan nêzanî’ û wina domna: “Sîstemo ke yew merdim tede hakim o de cîyayîya hêzan orte ra wedarîyayo û ti wesfê meclîsî nêmendo. Eke ma ziqaqan de û barîqatan de ca nêgirî, o wext ma meclîs de zî çin î. Eke ma wina nêkerî, ma nêşênî çîyêk bikerî.” Ma hetê dayîkan de yî Kongreya Demokratîke ya Şaran ya Ewropa (HDK-A) zî derheqê hêrişan de îzehetêko nuştekî da: “Dayîkê Şeme seba ke aqubetê vînîbîyayeyanê xo pers bikerî, ameyî têhet, labelê polîsan hêrişê dayîkan kerd. Terorê polîsan hetê Wezîrê Karê Zereyî Suleyman Soyluyî ra ameyo organîze kerdene. Dayîkê Şeme 23 serrî yo têkoşîn danî. Gelo dîktatorîya Erdogan û AKPyî bi hêrişkerdişî wazeno polîtîkaya vînîkerdişî newe ra ganî bikero? Xeylê cayanê Ewropa de çalakîyî ameyî viraştene. Nika ra pey zî do destek bidîyo na çalakîye. ” Dayîkî do sere nêronî Tevgerê Cinîyanê Kurdistanî yê Ewropa (TJK-E) zî babete ser o îzehetêk da û hêriş şermizar kerd. Îzehet de ame vatene herçiqas ke zext û zordarîya dewlete estî zî çalakîya dayîkan 700 hewte yo ke dewam kena û wina dewam kerdo: “Dewlete hewteyo sifteyîn ra nata rîyê xo yê faşîstî nîşanê dayîkan dana. Wa dewleta tirkî baş bizano ke bi no hawa xoverdayîşê dayîkan hîna zêde beno. Dayîkê Şeme sey hewteyanê verênan do sere nêronî. Dayîkî do vera faşîstan de sere nêronî û heta ke aqubetê domananê xo bizanî, çalakîya xo bidomnî. Ma do heta peynî hetê dayîkan de bibî.”  MERKEZÊ XEBERAN