M. ABDULKADÎR ESEN MA / RIHA
Muzîsyenê bi nameyê Cuma Sedefdîşî (Hozan Serwan) ke heta nika 2 albumî û 150 besteyê kurdî viraştî, zextan ver cuya xo ya muzîkî ya aktîfe qedêna û seba ke hetê madî de payan ser o bivindero, nika eşteyan arê dano.
Muzîsyen Sedefdîşîyî va ‘eleqeyê mi yê muzîkî dengbêjîya keyeyê mi ra yeno’ û wina domna: “Keyeyê mi de xeylê kesî dengbêjî kerdêne, cok ra şenikîya mi ra nata meraqê mi muzîkî rê estbî. Badê ke prosesê çareserîye qedîya, ma nêşêna muzîk bivirazî. Mi verê cû Radyoyê Karacadagî de program viraştêne, radyo ame padayene. Dima ra wextê pêrodayîşan de mi kanalêkê de muzîk viraştêne. Seba ke mi program de va ‘Wa Cizîr de merdimî nêmirî’ min û wayîrê televîzyonî lej kerd û mi fek ewja ra zî verada.”
Sedefdîşîyî va ‘se beno wa bibo, ez do fek ziwanê xo ra veranêda’ û wina dewam kerd: “Ez do goreyê sîstemî hereket nêkera. Wa hunermendî vindetişê xo ra tavîzan nêdî. Vatişê hunermendî aştîye yo. Kam se vano, wa vajo ma do fek aştîye ra veranêdî. Ez vatişê înan nêkena û xo rê cuyêka alternatîfe awan kena. Embazê ke xover dayî zî estî, yê ke teslîm bîyî zî estî. Ez Riha de şîbîya veyveyêkî û hetkarê walîyî zî amebi veyve. Hetkarê walîyî seba mi vato ‘kamî nê terorîstî ardo tîya?’ Yanî ma her ca de yenî cîya kerdene. Ma vatişê înan ra nêewnîyenî. Eke ti vatişê înan bikerî benî welatî, ti nêkerî ti benî terorîst.”