Celadet Elî Bedirxanî 15ê Gulana 1932 de paytextê Sûrîye Şam de Kovara Hawarî vet û na roje 2006 ra nata her serre sey Roşanê Ziwanê Kurdî yena pîrozkerdiş. Her serre 15ê Gulane de aktîvîteyê cîya-cîyayî yenî viraştiş û bale ancîyeno perwerdeyo bi ziwanê dayîke ser. Babete ser o Hemserekê Enstîtuya Stenbolî ke bi Qerarnameyê Hukmê Qanûnî ame padayîş, Samî Tanî qisey kerd.
Tanî bi pîrozkerdişê Roşanê Ziwanê Kurdî dest bi qiseykerdişî kerd û wina va: “Xeylê sazîyê ke seba ziwanê kurdî xebetîyayêne, ewro ameyî padayîş û mor dîya beranê înan ro. Dest ronîya kelmelanê înan ser de. Labelê tayê sazî û dezgeyî xebatanê xo domnenî. Hesaban ra vanî ziwanî ser de zext û tedayî çin î. Labelê pratîk de ma vînenî ke wina nîyo. Ganî merdim vera nînan de xebate bikero û xover bido. No zî ancax bi rêxistinbîyayîş mumkin o.”
Kurdî yeno astengkerdiş
Tanî dewamê qiseykerdişê xo de wina va: “Heta nika tayê beşê ziwanî ameybî akerdiş, labelê seba ke kesê ke nê beşan de xebetîyayêne, îmze eştbî vilaweka aştîye, ameyî îxraçkerdiş. Sey nimûne Unîversîteya Artuklu de 5-6 kesî estbîy. Unîversîteyê bînî zî astengîyan reyde têrî manenî. Emser tena 3 mamostayî tayîn bîyî. Bi deshezaran merdimî wazenî bi hawayo weçînite dersa kurdî bivînî, labelê raştê astengkerdişî yenî. Nê kesî bi manaya mamosta çin o û sewbîna de yenî astengkerdiş. Bi desan mamostayî ameyî îxraçkerdeiş û tayê zî surgin bîyî.”
Ganî mektebanê xo akerî
Tanî va ‘heta nika ma bin nameyê Zend Bîlîm Kultur Egîtîm Basin Yayin LTD. ŞTÎ de xebatê xo kerdêne, nika zî ma xebatanê xo sey Enstîtuya Kurd ya Stenbolî meşnenî’ û wina domna: “Badê ke Enstîtu ameye padayîş, grûbêk mamosta ameyî têhet û komeleyêk awan kerdî. Nameyê komeleye Komeleya Cigêrayîşî ya Kurdî yo. Tîya de xebatê ziwan û atolye dewam kenî. Ma nika xeylê zehmetîyan reyde rî bi rî manenî. Labelê ganî ma xover bidî û rêxistinîya xo xurt bikerî. Ganî kurdî seba akerdişê mektebanê xo hewl bidî. Bitaybetî seba akerdişê kreşan hewldayîşî bidî. Senî ke ma vanî ganî ma dewlete ra çîyêk nêpawî, ganî ma HDP, DBP û partîyanê bînan ra zî çîyêk nêpawî. Ganî ma xebatanê xo yê ziwanî zêde bikerî. Ma ancax bi no hawa eşkenî zextan derbaz bikerî.”
SADÎYE ESER / DÎHABER / STENBOL