Serokê Federasyonê Alewî Bektaşî Bakî Duzgun derheqê êrişê dûştê alewî û kurdan yê ke hetê komê ke bi vengdayişê Erdoganî vejyay kuçeyan de qisey kerd û da zonayen ke herbê mîyanî netîceyê hesasîyetê kurdan û alewîyan de ame manîkerden.
Badê hewldayenê derbe komê ke ser vengdayişê Reîscûmhûrê Tirkîye Tayyîp Erdoganî vejyay kuçeyan (cayanê zey Stenbol û Meletî de) destpa êrişê taxanê kurdan û alewîyan kerdî. Nê hewldayenê nîjadperwerî hona zî ramenê. Serokê Federasyonê Alewî Bektaşî Bakî Duzgun derheqê babed de Ajansê Xeberan yê Dîcle rê qisey kerd û vist vîrî ke mexdûrê tewr gird yê derbeyan alewî, kurdî û bindestî yê.
Alewî û kurdî zî bin talokeyê êrişan de yê
Duzgunî da zonayen ke hometa alewî her tim dûştê derbeyan de bî û aşkere kerd ke AKP nezdîyê 6 aşmîyo hewl dana ke civakeke goreyê xo rono. Bakî Duzgunî hayr ant vengdayişê vejyayişê kuçeyan ser û va; ‘komê ke vejyayî kuçeyan lejkerê ke bî teslîm bi wehşîyane qetil kerdî.
Duzgunî vist vîrî ke kurd û alewîyê ke dûştê derbe nûmayiş virazenê zî bin talokeyê êrişan de yê û nîya va: “Tayî komê ke vejyay kuçeyan taybetî alewîyan û kurdan hedef girotî. Hawira talokeyî ke netîceyê qrîzî de abîya bi hesasîyetê alewîyan û kurdan de amê manîkerdin.”
Serokê Federasyonê Alewî Bektaşî Bakî Duzgunî aşkere kerd ke tayî mafya û rêxistinê çete yê talokeyî nêşîyayî herbê mîyanî vejerê. Çike herbê mîyanî netîceyê hesasîyetê kurdan û alewîyan de manî bi. Duzgunî va, bi nê bîyayîşan komê ke Tirkîye de yê û xîtabê eynî civakî kenê dê jûbîyayena quwetî bikerê.
Hewcedarîyê quwetê cewherî
Dûştê êrişanê komanî nîjadperwer yê verra alewîyan xêlê temsîlkaranê alewîyan zî nêrazîbîyen damûsnay. Temsîlkaran aşkere kerdî ke rîwalo ke dewlet endî nêşkena civakî bipawo hewcedarîyê civakî bi dînamîk û quwetê cewherî esto. Alewîyê ke nê êrişan rê nêrazîbîyen damûsnay vistî vîrî ke yê ke vejyenê kuçeyan ‘şayîya demokrasî’ nê ‘şayîya paşverû’ virazenê. Temsîlkaranê alewîyan aşkere kerdî ke rîwalê na tablo alewî ewleyî de nîyê û hayr antî hewcedarîya rêxistinbîyen û tîvarîya alewîyan ser.
‘Toximê kîn û nefretî karenê’
Serokê Şûbeyê Îzmîr yê Federasyonê Alewî Bektaşî Mûstafa Aslanî vist vîrî ke pêrokîn wextê derbe û kaosî de alewî hedef yenê giroten û waşt ke pela faşîst ke hewl dana serdestê kuçeyan bo hedê HDP û CHP bikirêşîyo Meclîsî. Aslanî da zonayen ke yê ke bi tekbîrî kuçeyan de geyrenê cîyabîyayenan rê nefret veriştenê û va, kuçeyan de geyrayişê nînan do haştî û azadîyan nê, toximê kîn û nefretî bikaro. Mûstafa Aslanî da zonayen ke ê ne hetkarê derbeya lejkerî, ne zî hetkarê derbeya sivîl ê û qiseyê xo nîya ramit: “Ganî hetkarê Tirkîyeya demokratîk, laîk û azadîwaşt bime. Eke hikûmet û dewlet tîvarîya welatijan nêşkena bigîro ganî îstîfa bikero. Bi komanê ke şerîat ra hîm ghenê, tekbîr anê ra tîvarî nêbeno. Bi vengdayişê vejyayişê kuçeyan, reyna ziwankerdişê Madimakî demokrasî û haştî nêbeno.”
Kuçeyan de zihnîyetê dîkta
Îdarekarê Komeleya Demokratîk yê Alewîyan Bulent Felekoglu zî vist vîrî ke cûnta cûntayekê bîn vet. Felekoglu aşkere kerd ke yê ke na hişmendî ravey benê jew leteyê civakî zey ganîmetî vînenê û bin nameyê demokrasî kuçeyan de dîkta ferz kenê.
Îdarekarê DAD Bulent Felekoglu da zonayen ke rîwalê qewimyayişan alewî bi şik û gumanî yê û hayr ant êrişanê dûştê welatijanê alewî ser: “Nêameyayişeke gird vînenime. Xêlê ma xo ewleyî de nêvînenê. Keyeyê ma onca îşaret kerdî. Dûştê ma tacîzî destpa kerdî. Rexmo ke raştîya taxa Gazî zanê reyna zî waştî bi tekbîran şîyayiş virazê. Provokasyonekê mûxtemel êşkeno welatî bibo herbê mîyanî.”
Bulent Felekoglu vist vîrî ke verra na taloke zey alewî iyê dê rêxistinbîyena xo biramê û tîvarîyê xo bigîrê. Felekoglu tewr peynî de da zonayen ke pêdiyayinê înan bi Wezareta Karêzerrî dewam kenê û va la hikûmet nêşkena civakî bipawo, nayî ra ganî civak xo bi xo bipawo, hewcedarîya civakî bi dînamîk û quwetê cewherî esto.
DÎHA/STENBOL-ÎZMÎR