Endamê Konseyê Serekîya Pêroyî yê KCKyî Alî Haydar Kaytanî derheqê serrgêra 22. ya Zîlane de va ‘Zîlane bi çalakîya xo cewab daya heme qetlîyaman’ û wina domna: “Șexsîyetê Zîlane de unîversalîya kurdî vejîyaya orte. Çalakîya Zîlane yena manaya do hesabê qetlîyaman bêro pers kerdene.”
DILPAK DAG / ANF/BEHDÎNAN
Zeynep Kinaci (Zîlane) 30ê Hezîrana 1996î de merkezê Dêrsimî de vera merasîmêkê leşkerî de çalakîyêka fedaî viraştbî. Ewro serrgêra 22. ya şehadetê Zîlane yo. Babete ser o Endamê Konseyê Serekîya Pêroyî yê KCKyî Alî Haydar Kaytanî qisey kerd û qala Zîlane kerd.
Endamê Konseyê Serekîya Pêroyî yê KCKyî Kaytanî dîyar kerd ke o serrgêra 22. de hemraya Zîlane bi rêz û minetî yad keno û wina va: “6ê Gulana 1996î de vera Rayber Apoyî de hêrişêko bombeyîn ame viraştene û Hemraya Zîlane zî bi çalakîyêk cewab daye nê hêrişî. Çalakîya Zîlane mîyanê Têkoşînê Azadîya Kurdî de sifteyîne ya, dinya de nimuneyê ci estî, labelê mîyanê ma de ewil o.”
Kaytanî da zanayîş ke wexto ke çalakîye virazîyaye, o Kurdistan de bîyo û wina va: “Ewil ti kesê nêzanayêne kamî viraşto. Dima ra musayî ke embazanê ma ra yewe viraşto. Kesê ke viraştbi, pey xo de mektûbî verdaybî. Mi û Embaz Cemalî (Murat Karayilan) ma bêtel ser ro mektûbî goşdaritî. Dîyar bi ke mektûbî netîceyê fikirîyayîşêko kûr de ameybî nuştene. Merdim eşkeno nê mektûban sey manîfestoya cuya azade bivîno. Rexneyê Zîlane zî mektûban de estbî û mesaj dayêne şaranê bînan. Çîyêko winasî tarîxê kurdan de reya sifteyîn bîyêne û cok ra heta ke kurdî bibî do bêro vîr ardene.”
Cok ra nameyê xo kena Zîlane
Kaytanî qiseykerdişê xo de bale ant tercîhê Zîlane yê Dêrsimî ser û wina va: “Zîlane bi hawayo zanaye Dêrsimî tercîh kerdo. Seke yeno zanayene, Zîlane cinîyêka ciwane ya elewî ya. Dêrsim cografyayêka cîya yo. Cografyaya ke ewro tira Tuncelî yeno vatene, Dêrsim nîyo. Dêrsim cayê ke elewî û kurdî tede cuyenî, pêroyîya ci ra yeno vatene. Heta Erzîngan, Gimgim û Meletî, Elbîstan û Koçgirî şono. Dêrsim cografyaya yê ke xo sey elewî û kurmanc şinase kenî yo. Heme elewîyan de tesîrêkê ci yê winasî esto. Heme çîyî ra ver 38 de qetlîyamê girdî ewja de virazîyayî û vîrardişê ci hîna teze yî. Zîlane zî ferqê ci de ya û xora nameyê xo zî cok ra kena Zîlane.”
Şexsê aye de unîversalîya kurdî vejîyena orte
Kaytanî peynîya qiseykerdişê xo de wina va: “Zîlane bi çalakîya xo cewab dana qetlîyamê ke Kurdistan de bîyî. Beno ke xusûsen planêko winasî nêkerdo. Labenê bi no hawa cewabêko winasî dayo. Çimkî 29ê Hezîrane de rayberê xoverdayîşê Palu, Dara Hênê û Hêne Şêx Seîd û embazê ci zî yenî îdam kerdene. Embaze Zîlane rojêkê dima çalakîyêk virazena û na çalakîye zaf bimana ya. Name û şexsîyetê Zîlane de unîversalîya kurdî vejîyayo orte û çalakîya Zîlane yena manaya do hesabê heme qetlîyaman bêro pers kerdene. Ez yewna rey vera aye de bi rêzgirewtişî vileyê xo tewênena.”