Zeynep Kinaciya (Zîlane) ke 30ê Hezîrana 1996î de Dêrsim de çalakîyêka fedayî viraştbî, serrgêra 22. ya şehadetê xo de paytextê Armenistanî Erîvan, Silêmanî û Şengal de ameye yad kerdene. Cayo ke tede merasîm ame viraştene, bi poster û fotografan ame xemilnayene.
Merasîmê yadkerdişî de Medya Garzane qisey kerde û dîyar kerde ke çalakîya fedayî ya Zîlane hêrişê ke vera Rayberê Şarê Kurdî Abdullah Ocalanî de bîyêne veng vetî. Garzane wina domnaye: “Zîlane hem Tevgerê Azadîye û hem zî komelê kurdî de sey manîfestoyêk a. Tarîxê PKKyî de hertim wexto ke vera Rayberî û tevgerî de tehluke bîyî, goreyê wextê xo cewabî zî virazîyayî. Nê cewabî bitaybetî hetê cinîyan ra ameyî dayî. Bêrîtane, Zîlane, Vîyane, Arîn Mîrkane û xeylê qehremanê bînî wina yî.”
Garzane dewamê qiseykerdişê xo de wina va: “Zîlane bi dûştê zîhnîyetê xo seba komelê kurdî bîya model û seba Tevgerê Azadîye zî felsefeya cuye ya. Zîlane hêzê cinîye veto orte û nîşan dayo ke rayberîya cinîye senî yena kerdene. Ez veng dana cinî û ciwanan ke wa têkoşînê xo berz bikerî.”
Ma do hesabê ci bipersî
Heto bîn de Silêmanî û Şengal de zî seba yadkerdişê Zîlane merasîmî ameyî viraştene. Parka Azadî ya Silêmanî de ewil metnê çapemenîye ame wendene û dima ra muzîk û sînevîzyon ameyî nawitene. Şengal de zî rayberîya TAJÊ de merasîmêk ameye organîze kerdene. Xeylê kesî beşdarê yadkerdişî bîyî. Ser nameyê TAJÊ Neam Xwedêdaye va ‘eke şexsîyetê Zîlane ciwananê êzidîyan de bibîyêne, o wext dişmenî nêşênayêne hende zulm bikero’ û wina domnaye: “Ma do hesabê zulmî bipersî. Ganî êzidîyî têkoşînê Zîlane esas bigîrî.”
MERKEZÊ XEBERAN