Nika Bakurê Kurdistan de qederê şarê kurdî yeno nuştiş. La tayî roniştê tenya şer-herb temaşe kenê. Wextê rehetî de herkes vano, ez hinaya û ez hinaya. Wextê rehetî de herkes govend kaykeno xo mojneno. La wexto ke hewceyê egîdan bibo, aye verê cû xo pê govend mojnebî, remenê, meydan de nêasenê.
No derheqî de meseleya ‘şero weş û şero giran’ esta:
Seke zaniyeno miletê Kurd govende ra zaf heskeno û her firsend de veyve, nîşan, sinet de keweno govende. Serranê hezar û new sey û newayan (1990) ra dima, Bakurê Kurdistan de bi serhewadayinan, numayişan nê firsendî bî zîyadêr. Rojê yew şaristanê de semedê newroz numayişe beno. Merdimê ke bi xo govende ra zaf heskeno vengê hesneno. Vejîno teber ke çi vejîyo! Dawil, zurna, tilîlî… Hayleme hurhurit… Her kes sloganan erzeno govende kaykeno. No kî çing dano kewno govende. Xeylê ke coş beno dest pêkeno zirçeno, sloganan erzeno, govende kaykeno. Nîyadeno ke lajê ey yo balqone ra tey ewnêno. Gêreno ra lacê xo ser îşaretê serkewtene keno, sloganan erzeno. Zirçeno vano:
- Kuro were, kuro were, şer xweş e! (Lavo bê, lavo bê, şer weş o)
Laj kî yeno êdî laj û pî pîya kewenê govende. Tenê ke benê dûr esker, polîs û tîmî kewnê virendîya înan. Mileto ke govende kaykeno, sloganan erzeno, bîyo har. Tenêna ke benê nêzdî, esker girrîye nano ro înan ser. Vengê tifingan ke vejîno, milet pisqîno têra, her kes hetê ra remeno. No qehremanê ma kî veng dano laje xo vano:
- Kuro bireve, kuro bireve, şer giran e! (Lavo biremi, lavo biremi, şer giran o!)”
Nika şero ke Kurdistan de qewimîyeno eynî zê na mesele yo. Kam egîd o kam tersonek o, vejîyeno meydan. Kam welatperwero, kam welatroşeno vejîyeno meydan. Kam dostê şarê kurdî yo, kam dişmenê şarê kurdî yo vejîyeno meydan. Kam dîndarê raşto, kam dîndarê sexte yo vejîyeno meydan.
Kam demokrato, kam faşîsto vejîyeno meydan.
Kam wayîre vîcdanî yo, kam bêvicdano o zî vejîyeno meydan. Kam kamo raştîya her kesî vejîyeno meydan. Yew zî nêşkeno xo binimno.
Kam ke Amed de maneno, şerê Sûrî temaşe keno, hemberê dişmenî yew gam nêerzeno, o zî vejîyeno meydan. Seba Cizîra Botan, Sîlopîya, Nisêbîn, Kerboran û Gever zî hina yo. Kurdistan de kam ciwîyeno heqê yew çino ke tenya şerê nê cayan seyr bikero. Kam ke, hemberê dişmen nêkewo xoverdayîş senî eşkeno vajo ez Kurd a, ez însan a.
Ewro roj roje vindertiş nîyo. Ewro roj roje xoverdayîş o.
Ey Kurdo ma ti nêvînenê, dişmen bîyo yew. Gereka şarê kurd zî bibo, yew pêronê Kurdistan’î açarno caye xoverdayîş.