Dewija dewa Lazvanê Alîye Dogan ke hadreyînê zimistanî kena, da zonayen ke înan aşmanê wesarî de bostanê xo yê sewzî (zerzewat) û meywe karitiyo. Dogan diyar kerd ke bi payîzî ra pîya hadreyînê zimistanî kenê û va, nika zî ê şîlan, nehne û anûx (cehtire) wişk kenê.
Îsot ra heta riwen û torak
Dogan bi nê vatenan behsa gureyînanê xo yê hadreyînê zimistanî kerd: “Ma awa firingîyan viraşt. Ma firîngî, îsot û balcanan ra konserve viraşt. Ma balcan û îsot wişk kerd, vist kîsikê spî û dolabî de bi ca kerd. Herzewbîn ma heywananê xo ra ruwen û torak zî viraşt û seba zimistanî wedarna.”
Tirşî, kolî, çerez…
Cenîya bi nameyê Beşer Alptekîn zî da zonayen ke seweta zimistanî hadreyînê înan ya tewr peynî zî viraştişê tirşî yo. Alptekîn aşkere kena ke aşmanê payîzî de deqeyekê înan tol çîno û nîya dewam kerd: “Ma awa firingîyan ra heta tirşî, konserve û wişkkerdenê sewzeyan viraşt. Nînan ra pîya ma kolî, çilo û tepikî zî hadre kerdê.”
Herzewbîn xêlê keyeyan de sayê ke ameyê letekerden, ser texteyan de yenê wişkkerden. Dewijê ke engur, sa, goz û çîyê bînî wişk kenê, iyê dê şewanê zimistanî de şewbihêrkê xo bi nînan ravêrnê.
Tenya Dersim de nê, hama hama pêrokîn sûkanê Kurdistan de bi ameyişê payîzî hadreyînê seba zimistanî yenê kerdiş. Jû hetî ra hesadî yenê aredayen, heto bîn ra çiyê seba vesnayisî yenê hadre kerden.
DÎHA/DERSIM