Bifirê ke şima seba Kurd û Kurdistanê fek heme çîyê vereda yo. Şima bîyê fedayîyê Kurd û Kurdistanê. Şima fek meqam û mewkî, pere, mal û milk ra vereda yo. Yew ganê şima esto, şima ganê xo zî, gonî ya xo zî rayîrê Kurd û Kurdistanê de danê.
La rojêk ameyo û şima esîr kewtî destê dewleta dagîrker yê tirk. Şima kewtî beyntarê çar dêsan de. Dişmen nayê zî bes nêvîneno. Şima ra heqaret û îşkence keno. Zor û zilm keno. Beyntarê çar dêsan de kamera ca keno, şima seyrkeno. Eke şima bibênê, şima do se kerdenê? Şima bêveng mendenê, yan şima vatênê ma nê îşkence, zilm û zorî û bêexleqî qebûl nêkenî!
Ez şima her kesî rê perskena. Ey şarê kurdî û şarê bîn ayê vanî ma însanî! Şima sevatenê û şima sekerdênê? Şima qet nê persî xo rê kerdî? Şima qet veyşan mendî? Şima yew roj, di roj û des rojî veyşan mendî? Şima qet roj bi roj, deqîqe bi deqîqe helîyayê? Şima hucre bi hucre helîyayê?
Qet şima fikir kerdo ke şima 63 rojî grevê veyşanî de bî, dinya ser nayî kerr û korr û lal bo. Fîlîstînîjê ke girotxaneyanê Îsraîlî de kewtê girevê veyşanî, eynî deqîqe de medyayê dinya de veng da. Şima qet ser nayî fikir kerdo? Şima qet xo dekerd herindê iyê ke kewtî girevê veyşanîyê? Şima nayî persan xo rê bikerênê û dima ra bifikirênê, şima sekerdênê?
Şima Kemal Pîr, Xeyrî Durmuş, Êlî Çîçek û Akîf Yilmaz înan biardênê vîra xo. Şima qiseyê Kemal Pîr’î ke vano: “Ma ciwîyayîş ra hina heskênê ke, ma ayê oxir de mirênê.” Şima qiseyê “Kurdistan beno Vîetnam, qîrînê ma bişinawênê.” yê Xeyrî Durmuş’î biardênê vîra xo.
Nika Vîetnam çîyo ke, Kurdistan, Sûrîye û Lûbnan vîyerto. Beyrût vîyerto. Sûrîye de 6 serrîyo şer esto, yew bajarê Sûrîyê sey Nisêbîn, Sûr, Şirnex înan nêameyo xirabkerdiş. Surîyê de yew ganê ganê nêameyo veşnayîş. La pêronê nê çîyan hetê AKP û dewleta tirkî ra ameyê kerdiş. Tena nayî nêyê! 7 serrîyo nêverdênê awuqatê Serokê Kurd Abdullah Ocalan’î şêrênê eyê ra yewbîdîyayîş bikerênê. Nêzdîyê 7 aşmîyo xeber eyê ra çîna.
Tepişteyê zîndanî yê Kurd ver nê sebeban tam 63 rojî yo kewtî grevê veyşanîyê û xoverdayîş kenî. Ayê ke kewtî grevê veyşanîyê way û birayê ma yê. Keyna û lajê ma yê. Pêronê înan gan û gunîyê ma yê. Yew qet gan û gunîyê xo ra fek veredano? Ney.
Bêvengî beno? Ney. Wayîr vejîyayîşê xoverdayîşê înan, wayîr vejîyayîşê xo yo.