HAMDULLAH KESEN / MA/EDENE
Hepsîyê ke Zîndanê Tîpa Fyî yê Kurkçulerî de manenî, 6ê teşrîna peyêne ra nata bi hawayo dore seba 5 rojan greva vêşanîye dayî destpêkerdiş. Hepsîyî seba wedarnayîşê tecrîdo ke Rayberê Şarê Kurd Abdullah Ocalanî ser de esto û sehnayîşê ke zîndan de estî, bêrî wedarnayîş, kewtî grevê vêşanîye.
Serekê Komîsyonê Taqîpkerdişê Zîndanî yê Baroya Edene avûkat Tugay Bekî hepsîyan zîyaret kerd û derheqê pêvînayîşî de qisey kerd. Bekî qiseykerdişê xo de qala neheqîyan kerd û wina va: “Hepsîyî dîyar kerdî ke heta ke neheqîyê dewam bikerî, ê zî çalakîya xo bidomnî. Ma do sey Baroya Edene do dozger û mudurê zîndanî reyde pêvînayîşan bikerî.”
Bekî dewamê qiseykerdişê xo de va ‘kerdişê têmîyan bike û pê bîyare polîtîkayê 12ê êlule ya’ û wina domna: “Seba ke hepsîyê PKK, DAIŞ û FETOyî eynî korîdor de manenî, pîya vejîyenî pêvînayîşî. Beno ke provokasyonêko şenik do bibo sebebê problemêko gird. Ma çend reyan na rewşe îdareyê zîndanî ra vato, labelê hîna zî no het de israr kenî. Wa îdare fek nêyî ra verabido.”
Dest ronîyeno pawitişê hepsîyan
Bekî bale ant kerdişanê zîndanî ser û wina va: “Koguşan de kutikan reyde sehnayîş virazenî û heme kelmelanê hepsîyan vila kerdî. Wexto ke hepsîyî sebebê sehnayîşo winasî kenî, vanî ‘ma bombe gêrenî’. Çîyêko winasî mumkin nîyo, amancê îdareyê zîndanî teslîmgirewtiş û şiknayîşê îradeyê hepsîyan o. Îdareyê zîndanê teber ra kitaban nêgêno. Ti sebeb nîno nîşandayîş û dest ronîyeno kitabanê zereyî de ser. Heto bîn ra dest ronîyeno notê pawitişî yê hepsîyan ser.”