Zîndananê Kurdistan û Tirkîya de roje çin a ke xeberê zext, neheqî, îşkence û sewbîna nêro. Bitaybetî OHALî ra dima nê zext, teda û îşkenceyî resayî dûştêko tewr berz. Hewl dîyeno şexsê hepsîyan de pêroyîya kurdî yenî teslîm girewtene.
Mizgîn Akmana ke Êlula 2017î de Stenbol de ameye tepiştene û Zîndanê Bakirkoyî de mende, di hewte verê ameye tehlîye kerdene. Akmane qala neheqîyanê zîndanî kerde û wina va: "Wexto ke mi newe berdî zîndan, sehnayîşê rutî mi ser o ferz kerdî. Ma ser o ferz kerdî ke ma şêrê koguşanê xoseran. Eştî serê koguşan. Wextê sereştişî de radyoyê ma ma ra girewtî. Nika koguş de radyo çin o. Rojname nêdanê. Teber reyde ti têkilîye çin a."
Akmane dîyar kerde ke hepsîyê nêweşî sewqê nêweşxane nînê kerdene û yê ke yenê sewq kerdene zî wextê dermankerdişî de kelepçeyê înan nînê akerdene û wina va: "Wexto ke benê nêweşxane zî înan ra vanê ‘şima terorîst ê, xayînê welatî yê. Ma şima ardo nêweşxane û hema şima vanê kelepçeyê ma abikerê'. Seba hemwelatîyê derûdorî ser o tesîr bikerê, hewl danê. Hepsîyê ke wextêko derg o tepişte yê nêbenê revîr û nêweşxane. Sureyya Buluta ke cezaya muebedî girewta zî gonî qelbnena. Gerek berê nêweşxane la kes nêame ser. Hepsîyê nêweşî terkê mergî ameyî kerdene."
Akmane arde ziwan ke verê zî wexto ke hepsîyî sewqê nêweşxaneyî kerdê, bi hepsîyê edlîyan dir eynî rîng de berdê û ardê. Bi no hawa verê çimanê leşkeran de hepsîyê edlîyî hêrişê hepsîyanê sîyasîyan kerdênê. Akmane dewamê qiseykerdişê xo de va ‘hacetê ke bi kargo yenê zî dimayê cigêrayîşêko derg yenê dayene û wina va: “Wextê OHALî de zî antişê fotografan amebi qedexe kerdene û bi ti hawayî desturê antişê fotografan nêame dayene.”
JINNEWS / STENBOL