Îqtîdarê AKP û Erdoganî vera sîyasetê demokratîke de bi polîtîkaya zulm, zordarî û tepiştiş domnena. Bi hezaran sîyasetmedarê kurdî nika zîndanan de yenê tepiştene.
Hemserekê HDP yê Stenbolî Cengîz Çiçek 2 aşmî verî rêxistina qezaya Gungorenî ya HDP de bi desan endam û îdarekaranê HDPyî amebî tepiştene û dima ra zî erzîyabi zindanê Sîlîvrî. Cengîz Çiçekî armancê tepiştiş û rewşa zindanan ser o qisey kerd.
Çîçekî dîyar kerd ke AKP îqtîdarê xo bi polîtîkaya zulm û zordarî lingan ser o vindarneno. Komelê Demokratîke vera faşîzmê AKP û MHP de bihêrs o û partîya ma nê komelî temsîl kena. No sebeb ra zî îqtîdaro faşîst îdarekar û endamanê ma bi hawayo keyfî tepişeno û erzeno zindanan. Tepişîyayîşê ma zî bi na polîtîka ra girêdaye bi û ma bi hawayo keyfî 2 aşmî zindan de esîr ameyî tepiştene.”
Ganî ma nîşanê îqtîdaran bidî
Hemserekê HDPyî yê Stenbolî Cengîz Çiçekî bal ant ser rewşa tepişteyanê nêweşan û wina va: “Xeylê tepişteyê nêweşî zîndanan de manenê û hetê dewlete ra sewqê nêweşxaneyan nêbenê û nînê derman kerdene. Zindanê Tîpa Tyî yê Sîlîvrî de koguşî goreyê 7 kesan ameyê awan kerdene, la nika her koguş de 40 tepişteyî manenê. Îqtîdarê Tirkîya raştîya civake ra zaf durî yo û cok ra zî gere ma raştîya komelî bi tekoşînî nîşanê îqtîdaran bidî.”