Tepişteyê ke dawaya PKK û PAJKî ra zerre de yê serva ke hayr biancê azadîya Rayverê Şarê Kurd Abdullah Ocalanî ser o yew beyanat weşîna. Benayatî de ame waştiş ke wa vera polîtîkayanê AKP yê tecrîdê Îmralî şarê kurd û derûdorê demokratîkî pîya tekoşîn bikerê û hukmatê AKP ke tecrîdê Îmralî de israr keno ame îqazkerdêne.
Beyanato ke bi nameyê Denîze Kaya ame neşrkerdiş de vistîya vîrî ke şaranê Tirkîye 7ê Hezîrane de îradeyê demokrasî û aştî îlan kerd û vajîya, la AKP bi derbeya 14ê Temmuze ya sîvîle no îrade çin hesibna. Beyanatî de hayr ancîya îqazanê Rayberê Şarê Kurd yê mekanîkê derbeya leşkerîye ser û wina vajîya: “Tabloya ke teşebusê derbeya leşkerî ya 15ê Temmuze de vejîya orte verê cû hetê rayberê ma ra amebi tespîtkeridiş, la AKP nê îqazî goşpey kerdî. AKP ke bi xo zî hukmatê derbeya sîvîl a 15ê Temmuze ra pey semedo ke suc û karakterê xo yo despotîk binimno yew hîle kena û her kesî xapînena. Semedo ke Erdogan xeyalanê xo yê sîstemê serekîye bîyaro ca teşebusê derbeya 15ê Temmuze xo rê keno malzeme. Heto bîn ra CHP ya ke her tim vana ‘Ez vera derbeyan ca gêna’ zî goreyê polîtîkanê AKP hereket kena û înan rê çepikan dana piro. Semedo ke CHP Erdoganî reyde ortaxî kerda rîyê ciyê rastikên vejîyo orte. Nika bi destanê AKP rayberê ma rê yew tecrîdo bêînsanî vistîyayo dewre. Tena tecrîd nê, her cayê Kurdistanî de operasyonê îmha estê. Hukmat seba dişmenetîya kurdan zere û teber de îtîfaqanê lêminan keno. Bi no qayde keno ke xo newe ra dîzayn bikero û rejîmo otorîterî qewetin bikero.”
Quwetinkerdişê blokê demokrasî
Beyanatê tepişteyanê dawa PKK û PJAKîjan de ame îzahkerdiş ke, derbeyê sîvîl û leşkerîye encex bi tekoşînê demokrasî û pêro-pîyayî yenê vindertiş û wina vajîya: “Seba şaranê Tirkîye û bindestan tena yew rayîro alternatîf esto o zî pîya tekoşînkerdiş o. Ganî blokê demokrasî bêro quwetinkerdiş û tekoşîna pîyayî bêro dayêne. Îxtîdarê AKP vano ‘Ma rê derbe ame kerdene’ û naye ser o îxtîdarê xo keno sexlem. Heme zur ê. Ma vînenê ke hukmatê AKP bi qanûnanê OHALî keno ke wa şarê ma azad nêbo û qederê xo tayîn mekero. Ewro derbekaran rê operasyonî yenê viraştêne la nameyê nê operasyonan ser o hem zere hem zî teber de Hereketê Azadî yê Kurdan rê, derûdorê demokratan rê operasyonî yenê viraştêne û hêrişî yenê kerdêne. Îlanê OHALî ra dima muameleyo ewilin rayberê ma rê ameyo kerdêne. Tecrîdê Îmralî ispatê nê muameleyî yo. Ma rayberê xo ra yew tek xebere nêgirewta. Ma weşî û asayîşî ey ver qisawetin ê. 3 leşkerê ke Girawa Îmralî de wezîfe kerdêne ameybî tepiştêne. Bi no qayde hêrsê ma û qesawetê ma zêde bîyê. Lazim o şarê ma û ma ci ra xebere bigîrê. Çimkî her muameleyo ke raberê ma rê beno seke ma û şarê ma rê bîyo yo.”
Azadîya rayberê ma azadîya şarê ma ya
Tepişteyan beyanatê xo de waşt ke her ca de tekoşînê demokrasî bêro dayêne û wina va: “Ma sey tepişteyê Hereketê Kurdan, PKK û PAJK rojevê ma yo esasî azadîya rayberê ma yo. Azadîya rayberê ma û azadîya şarê ma seba ma yew ê. Seba rewşa rayberê ma çalakî û aktîvîteyê ma dê dewam bikerê. Prosesê Sîyasî de pêrodayîşî hende çetîn bîyê ke tena bi hiqûqî tekoşînî kerdêne bes nîyo. La onca zî ma gereke bizane ke netîceyê tekoşînê hiqûqî zî estê û aye ra ma yew tek cayê tekoşînî veng (tal) nêverdîme.”
Beyanat bi na waşten û vengdayişî qedîya: “Ma naye ser o wazenê wa keyeyî, şarê ma, heme sazîyê demokratîk û derûdorê demokratîk her ca de seba awankerdişê komela demokratîke wezîfeyê xo bîyarê ca û seba azadîya Rayberê Şarê Kurd Abdullah Ocalanî tekoşîn bikerê."
NAVENDÊ XEBERAN