Zirar dano yewîya neteweyî

Kongreya Komelê Demokratîke vera vatişê Nêçîrvan Barzanîyî de îzehetêk daye û dîyar kerde ke îzehetê Nêçîrvan Barzanîyî zirar dano yewîya neteweyî ya kurdan. Heto bîn de welatîyê Kampa Mexmurî zî vera vatişanê Barzanîyî de reaksîyon nîşan dayî û dîyar kerdî ke ê Barzanî dawetê dîyayîşê raştîyan kenî.

Serekê Herêma Başûrê Kurdistanî Nêçîrvan Barzanîyî dagîrkerîya Başûrê Kurdistanî ser o vatbi ‘PKKyî erdê Başûrê Kurdistanî talan kerdo’. Vera vatişanê Barzanîyî de her ke şono reaksîyonî zêde benî. Reyna Barzanîyî 2 rojî verê wextê sondê Serekkomar Erdoganî de ame meclîsê Tirkîya û bi meymanê Erdoganî. Barzanîyî Erdoganî reyde tayê pêvînayîşî zî kerdî.   

Kongreya Komelê Demokratîke (KCD) derheqê qiseykerdişê Serekê Herêma Başûrê Kurdistanî Nêçîrvan Barzanîyî de îzehetêko nuştekî daye. KCDyî îzehetê xo de dîyar kerdo ke Barzanî bi qiseykerdişê xo hêriş û dagîrkerîya Tirkîya meşrû keno.

KCDyî îzehetê xo de qala polîtîkayanê hêrişkar û faşîstî yê dewleta tirkî kerdo û wina vato: “Referandumê Xoserîye yê Başûrî ra dima nizdîbîyayîşê dewleta tirkî hîna vîrê herkesî de yo. Çareserîya heme probleman ancax bi yewîya neteweyî mumkin o. Xora na raştîye îzehetê ke hetê partîyê sîyasî û dezgeyê demokratîke ra zî ameyî dayene de zî ame dîyayene.”

KCDyî îzehetê xo de vato ‘îzehetê Birêz Barzanîyî nîşan dano ke hetê yewîya neteweyî de tayê çîyan fam nêkerdo û tecrubeyan ra çîyêk nêvetî. Îzehetê ke derheqê Qendîlî de ameyî dayene, zirar danî yewîya neteweyî û seba dagîrkerîye cesaret dano dewleta tirkî. Ma veng danî heme partîyê sîyasî û îdarekaran ke wa îzehetê winasî ke zirar danî yewîya neteweyî ra dûrî bivinderî.”

Wa Nêçîrvan raştîyan bivîno

Heto bîn de Hemserekê Komeleya Keyeyê Şehîdan ya Komeleya Mexmurî û keyeyê şehîdan zî vera îzehetê Nêçîrvan Barzanîyî de reaksîyon nîşan dayî û dîyar kerdî ke ê Nêçîrvanî dawetê vînayîşê raştîyan kenî. Dayîka rojnamegere Denîz Firata ke hêrişê Mexmurî de şehîd kewtbî Sultan Yildiztane va ‘ez îzehetê Nêçîrvan Barzanîyî ver ez ci şermizar kena’ û wina domna: “Dewleta tirkî Kurdistan dagîr kena. Nêçîrvan zî hemkarîya dewleta tirkî keno û îqtîdaro ke bi gonîya kurdan miqate beno, ci pîroz keno.”

Tarîx de nimuneyê ci estî

Hemserekê Komeleya Keyeyê Şehîdan ya Kampa Mexmurî Hadî Pusatî zî wina va: “Dewleta tirkî nika erdê Kurdistanî talan kena. Ma pawitêne ke Nêçîrvan û keyeyê Barzanîyî reaksîyon nîşan bidî. Labelê tersê hêvîya ma, cesaret dayî faşîst û dagîrkeran. Beno ke hesabê înan yê cîyayî estî. Tarîx de nimuneyê ci estî. Ma wextê referandumî de dî ke senî vera Başûrî de vindenî. Ma vatişê Nêçîrvanîyî şermizar kenî.”

Dayîka rojnameger Rizgar Denîz ke Hemleya Firtineyê Cizîrî de şehîd kewtbi Meryema Adanmişe zî wina va: “Ma vatişanê Nêçîrvanî ver şerm kenî. Şarê Başûrî vera dagîrkerîye de sere wedarneno. Labelê Nêçîrvan wina vano. Na rewşe ver merdim şerm keno. Ganî Nêçîrvan vatişanê xo ver xora şerm bikero û reyna wina nêvajo.”

MERKEZÊ XEBERAN