15’ê Gulane Rocê Roşanê Ziwanê Kurdî yo. Sey ke ma zanê no roc rocê tarîxa weşênayîşê kovara bi nameye Heware yo ke 84 verê nika hetê Celadet Elî Bedirxanî û hevalanê ey ya amîya weşênayîşî.
Raya yewine alfabeya latînî ya kurdî na kovare de ameya xebetnayîşî. Na kovare bi desan nûştoxê erciyaye sey Cegerxwîn, Qedrî Can, Osman Sebrî, Nûredîn Zaza û zwb edebîyatê kurdî rê zêdnayî. Ma eşkenê vacê ke na kovare bî mifteyê fekê xezînayê folklor, edebiyat û kultûrê kurdî.
Bê ziwan kurdîtî rûmet nîya
Celadet Elî Bedirxanî bi rayîrê nameyê na kovare hewar kerdo şarê kurdî û vato ‘Eyb o, şerm o, yan bi ziwanê xo bimûsê wendiş û nûştiş, yan zî mevacê ma kurd ê. Bê ziwan kurdîtî şima rê rûmet nîya, ma rê risîyatîyêka giran a.’ Ancî ziwanzanê erciyayey mexsedê vetişê na kovare bi nê vatişan ardo ziwan ‘Hawara ma vernîya her çî, ko estbîyayîşê ziwanê ma bido naskerdişî, loma ke ziwan şertê estbîyayîşî yê vernî yo.’ Û loma kurdanê ziwanheskerdan zî waşt wesîyetê înan bîyarê ca û qerar da ke na roce sey roşanê ziwanê kurdî pîroz bikerê.
‘Hewnê asîmîlasyonî ra werzê’
Hewara ke heştay û çar serrî verî ro kurdan amî kerdişî roc bi roc, serre bi serre vengê xo zêdetir berz kena û vana; ‘Kurdêne hewnê asîmîlasyonî ra wirzê we û raştîya rihê xo bicuyê. Fek ziwanê dagirkerdanê xo ra verra bide wayîr ro ziwanê pîrik û kalikanê xo, ro ziwanê dayîka xo vecîyê.’ Bi raştî zî semede şar û neteweyan muhîmîya ziwanî cayêka zeh pîle gêna. Merdim eşkeno vaco ke ziwanê merdimi rihê merdimi yo. Merdim bi ziwanê kam neteweyî qise bikero, merdim rihê ey neteweyî gêno. Kesê ke nêwazenê bibê xerîbê rihê xo lazim o bi ziwanê neteweya xo qisey bikerê û bi tûtanê xo bide qisekerdişî. Kesêke nêwazenê bibê xerîbê ziwan, edebiyat û kultûrê xo lazim o ke perwerdehî bi ziwanê xo bivînê.
Ferz o ke zonê xo aver berime
Şarê ke mafê perwerdehîya bi ziwanê xo ra biyêrê bêrîkerdişî konê binê xetereya vinîbîyayîşî, loma lazim o haye şarê kurdî rocêke rewtir ro na xetereye bibo û semede raşte ra wedartişê na xetereye xebatanê xo bizêdnê. Ay xebatan ra yew tera wayîrvetişê ro dibistananê azad o. Her ferdêke kurdî ser de ferz o ke semedê averberdiş, xurtkerdiş û zêdekerdişê dibistananê azadan bixebetyo. Ancî lazim o her kurdêke bibo neferêke ziwanî û bi ziwanê xo her rocî û heme qadanê civakî de qisey bikero. Raşta 15’ê Gulanî sey Roşanê Ziwanê Kurdî ameyo qebûlkerdişî la eke ma wazenê ey roşanî bi wateyê ey de û goreyê raştîya ey pîroz bikerê lazim o ma ziwanê xo heme gaman, rocan û aşman de vila bikerê û bi ruhê xo yê raştî bide ciwiyayîşî. Mekerê xo vîr ra ziwan rih o û merdim bê rih nêcuyêno.Bi hêvîya ke kurdî bibê wayîrê ruhê xo Roşanê Ziwanê Kurdî ro heme kurdan pîroz bo.
NESRÎN NAVDAR
Çewlig de panelê kirdkî
Şaxa KURDÎ-DER ê Çewlig çarçoveyê Roja Roşanê Ziwanê Kurdî de panelekê bi kirdkî virazena. Ziwanzanê kurd M.Malmîsanij û mebûsê Çewlig Prof. Hîşyar Ozsoy tewrê panel benê.
Bi nêzdîbîyayişê Roja Roşanê Ziwanê Kurdî sazgehê ziwanî yê kurdî zî kewtî hereket. Çarçoveyê 15ê Gulane de xêlê sûkan de aktivîte û nûmayişê zey panel, şiyayiş, aşkerekerdiş û aktivîteyê sb. virazîyenê.
KURDÎ-DER yê Çewlig zî bi munasebetê Roşanê Ziwanê Kurdî, 14ê Gulane de derheqê rewşê kirdkî de panelekê virazena. Panel de babedê ‘Ziwanê ma senî xelisîyeno?’ û ‘Têkilîya Ziwan û Sîyasetî’ yenê munaqeşe kerden. Unîversîteya Artuklu ra ziwanzan M.Malmîsanij û mebûsê Çewligî Hîşyar Ozsoy zey panelîstî tewrê na organîzasyonî benê. Panel 14 Gulane, seat 14:00’î de Merkezê Cîwanîye yê Weysel Belgînî, Karşiyaka de virazîyeno.
NAVENDÊ XEBERAN