Erdoganî ra çi diyo û mûsayo, winî hereket keno. Zey Erdoganî qîreno, zey ey tehdît keno, zey ey fermanê kişten dano. Zey ey wayirê kiştoxan vejiyeno. Bi kilmî zey Erdoganî ziwanê Davutoglu ra jî, axû vareno. Davutoglu jî her firsedî di, dişmenînê vera kurdan û ziwanê xo yê axûyin mûsneno.
Nimûneyê peyin jî, qiseyê Davutoglu ê vera Hemserekê HDP Selahattîn Demîrtaş o. Davutoglu heftî miyan di, êrişê Demîrtaş kerd. Zeki, o bi xo mesûlê kiştena bi desan kurdistanijan nêbo qisey kerd. Zeki kesê fermanê kişten, êriş, binçimkerdin û girotinan, o nêbo qisey kerd û keno. Teniya 6'ê cotmeh ra na kişt, nezdiyê 40 kurdistanijî kişiyay. Qe jew polîs û leşkerê kiştox nêgirotiya. Derheqê qe jew kiştoxî di, dawa nêabiyê. Abiyo jî, qandê pakvetina kiştoxan abiyaya.
Mesûlê kurdistanijê 6'ê cotmeh ra kişt kişiyayê, rast ra rast Ahmet Davutoglu yo. Mesûlê binçimerdinê bi hezaran kesan û girotina nezdiyê hezar kesan jî, ancî Davutoglu yo la qandê mesûlîna xo binimnayno, winî hereket keno. Heto bîn ra jî, Demîrtaş hedef-girotina, hadreyinê şîdet û kiştenanê rojanê ravey keno. Nika ra wazeno, Demîrtaş bikiro hedef û mesûlîna kiştenanê nika ra tepiya ra bixelseyo.
Davutoglu û rayveranê AKP, verî jî êrişê Demîrtaş kerdê. La belê badê weçînayinê serokkomarîn, êrişê vera Demîrtaş'î açarnay, lînçê siyasî. Davutoglu û embazê ey, şexsê Demîrtaş'î di, sahaya siyasetê demokratîk, heme weçînayoxê rayê xo daybi ey, hedef genê. Davutoglu û embazê ey, wazenê kesê weçînayinan di, rayan bikirê vêşî û bibe ûmûdê weçînayoxan werte ra hewadê.
Na ray di, tecrubeyê AKP'ijan tayn jî niyo. Zey nimûne Numan Kurtulmuş, Suleyman Soylu û xeylê kesî bi rayanê ciya ciyaya antî xo miyan. Kesê ki nêşenê biancê xo miyan jî, zey nimûneyê Demîrtaş'î hedef genê. Wazenê îtîbar û hezkerdinê vera înan kemî bikirê. Enê rayê ki AKP vera kesanê bînan xeftinaya, wazena vera Demîrtaş jî bixeftino. La belê şarê kurd û çoşmeyê demokratîk jî, vera kay û hesabanê wina wayirê tecrubeyê. Zey vizêr û perey, meşt û bîro jî, firsed nêdanê AKP.
Mehmed Drewş