Emser zî dibistanê Tirk abenî. No dibistanan de pê ziwanê Kurdî perwerde çîno. Pêrone perwerde pê ziwanê Tirkî û ziwanê bînano. Têna pê ziwanê Kurdî perwerde qedehe yo.

  Seyî Komare Tirk awan, bîyo uca ra heta nika-nata- eynî rewş dewam keno. Dewleta Tirk, tutanê(domam) ma gena bena, pê ziwanê Tirkî perwerde kena û wazena bikero Tirk. Tayî Kurd bin tesîre na polîtîkayê Tirk de mendî, helîyê û bîyê dewşîrme Tirk. Texmînî yeno vatiş ke, 5-6 mîlyon Kurd, hina helîyê û bîyê dewşîrme Tirk.  Pêser humarê Şarê Kurd nêzdiye 25 mîlyon yeno texmîn kerdiş. Eger mîyanê înan de 5-6 mîlyon Kurdi bîyê dewşîrme Tirk se, 5 parçe Kurdan ra 1 parçv helîyê û qirbîyê. Ameyê qirkerdiş. La no qirkerdiş de ma vaji, têna dewleta dagirker a Tirk sûcdara rast nîbeno. Sûce Şarê Kurd zî esto. Şarê Kurd destê tutanê xo geno û beno teslîme dewleta Tirk,dibistan û mamostayanê Tirk keno. Bi zanayîş beno, bê zanayîş beno, seyî beno wa bibo pê destê xo tutanê teslîme qirkeran keno. Tutanê xo dano qirkerdiş. No rewş seba Şarê Kurd şermo. No rewş seba Şarê Kurd, bi destê xo koke xo qirkerdişo. Heta vejîyayîşê PKK no rewş dewam kerd. La bi vejîyayîşê PKK, Şarê Kurd xo hesîya. Zana bi. Netewa Kurd newe ra awan bî. Şarê Kurd serberz bi. Şarê Kurd xoverdayîş kerd. Şarê Kurd hetê kûlturî de raverşi, hîşyar bi. Rojname zê Azadîya Welat weşana. Rojname Azadîya Welat ewro hem bi zaraveya Kirdkî-Zazakî,Kirmancî, Dimilî- hem bi zaraveya Kurmancî weşan keno. Zafe bajaranê Kurdistan û Anatoliya de Kurdî Der awanbîyê. Şarê Kurd, pê nê dezgehan Kirdkî û Kurmancî mûseno .
Nika zî hewe ewwîla hîrê dibistanê Kurdî Amed, Şirnêx û Colemêrg de abîyê. Seba ma destpêkeke newe yo.  Şarê Kurd emser bi awankerdişê dibistanên Kurdî ê hetêk ra tutanê xo bişirawo dibistanê Kurdî, hetêk ra zî dibistanê dewleta dagirker a Tirk boykot bikero. Yanî awankerdişa netewa demokratîk a Kurd û redkerdişê qirkerdişa dewleta Tirk kiştê yewbîn de bîyero ramitiş. Şarê Kurd, gera hina boykotê dibistananê Tirk bikero ke, yew tutê-domam- Kurd nêşîyero dibistanê Tirk. Hetêk bîn ra gera Şarê Kurd hîrê dibistanê Kurdî dibikero û pêro dezgeh û keyeyê xo bikero dibistanê ziwanê Kurdî.
Wexto ke Şarê Kurd hina bikero, Şarê Kurd qirkerdiş ra xelas beno. Wexto ke Şarê Kurd hina bikero, azadîya Kurd û Kurdistan nêzdî beno. Ma Şarê Kurd nêzano, fîlozofek vano ke,  “Ziwan ciwîyayîş o-gîyan,jîyan”-. Ayê ke ziwanê xo nêzanê, eşkenê vajê ma ciwîyenî!
Ayê ke ziwanê xo nêzanê, eşkenê vajê ma Kurdî! Bena tayî kesî seba no vatişê hêrs zî bibenê. La na raştîyekîya. Gera pêronê Şarê Kurd gore na raştî dibistananê dewleta Tirk boykot bikero. Gero pêronê Şarê Kurd gore na raştî tutanê xo bişirawo dibistanê Kurdî-Zazakî,Kurmancî-. Çunke bê ziwanê Kurdî-Zazakî,Kurmancî, Soranî, Hewramî, Kelhûrî, Lekî, Lorî, Pehlî- ne ciwîyayîş beno, ne zî azadîyê Kurd û Kurdistan beno. Tebere nayê de çi bîyero kerdiş, xo xapnayîşo, qirkerdişa dewleta Tirk qebul kerdiş o. Seba nayê gera şîyarê Şarê Kurd hina bibo. “Boykot! Boykot! Dibistanê dewleta dagirker a Tirk boykot!
Dibistanê Tirk boykot bikerê!
Kirdkî bi fikirê!
Kirdkî bi nusnê!
Kirkkî bi wenê!
Tutanê-domame- bişirawi dibistanê Kirdkî!”