Mehkemeya Cezayê Girane ya 2. ya Xarpêtî qerarê xo yo seba çi 9 serrî, 4 aşmî û 15 rojî ceza dayo muxabîrê Ajansê Dîhaberî Mehmet Guleşo ke wexto ke Edlîyeya Xarpêtî de xebere taqîp kerdêne, amebî tewqîfkerdiş, aşkere kerde. Qerarê mehkeme ke 17 rîpelan ra pê yeno, 8 rîpelê ci de awanbîyayîş û mekanîzmaya PKK û KCKyî ameyo vatiş. Mehkeme qerarê xo de vato ke ‘Guleş endamê Ajansê Xeberan yê Dîcle ke bi Qerarnameyê Hukmê Qanûnî (KHK) amebî padayîş û hetê Heyetê Ewleyîya Milî (MGK) ra îlegal amebî şinasekerdiş o’.
Endamê KJA yo!
Heme kerdişê Guleçî yê rojnamegerî hetê mehkeme ra sey delîlê sucê ‘endamê rêxistine bîyayene’ ameyî nîşandayîş. Cok ra heme pêvînayîşê telefonî yê Guleşî sey sûc ameyî hesibnayîş. Pêvînayîşê ke Guleşî seba roportajê merasîmê cenazeyê HPGyîyan, 15ê Sibate û Keyeyê Mazlum Doganî sey delîl ameyî nîşandayîş. Seba ke Guleşî qiseykerdişê xo yê telefonî de qala KJA kerdo, hetê mehkeme ra mîyanê şemaya rêxistine ya KJA de ameyo nawitiş. Guleşî seba ke rewşa peyêne ya herême biresno, beşdarê Med Nuçe TVyî bîbî û no beşdarbîyayîş zî hetê mehkeme ra suc hesibîyayo.
‘Endamê linga çapemenî yo’
Mehkeme qerarê xo de bale anto ziwanê xebere yê Guleşî ser û wina vato: “Ziwan, pêşkêşkerdişê xeberan û babetê ke ameyî destgirewtiş de aseno ke Guleş endamê linga çapemenî ke girêdayeyê rêxistina terorî yo.” Reyna mehkeme îdîa kerde ke parekerdişê Guleşî yê medyaya komelkî ser ro zî sey ke endamanê rêxistine sempatîk nîşan dayo. Reyna mehkeme îdîa kerde ke Guleşî nê parekerdişan wexto ke xoserîye ameybî îlankerdiş de kerdo û Guleşî bi nînan çalakîyanê PKK û KCKyî meşrû nîşan dayo. Mehkeme seba xeberanê Guleşî 6 serrî, 3 aşmî, seba parekerdişê medyaya komelî 3 serrî, 1 aşme û 15 rojî; pêro pîya 9 serrî 4 aşmî û 15 rojî ceza dayo Guleşî. Guleş û avûkatê Guleşî qerar temyîz kerd.
DÎHABER/AMED