Ahmet Fîdano 110 serreyî ke şahidîya Qetlîyamê Dêrsimî kerdo, dîyar kerd ke zulmo ke ma serranê 1937 û 38î de dî, ewro zî dewam keno û wina dewam kerd: “Ez do hertim qala nê zulmî bikera, wazenî wa mi bierzî zîndan. Ez do fek vatişê zulmî ra veranêda. Çimkî zulm ewro zî dewam keno.” SEMRA TURAN MA/DÊRSIM Qetlîyamê 1937 û 1938î yê Dêrsimî de bi deshezaran merdimî ameybî qetil kerdene û bi sehezaran merdimî zî ameybî surgun kerdene. Dewe û qezayî ameybî talan kerdene û ameybî veşnayene. Kesê ke şahidîya qetlîyamî kerdbî roja ma ya ewroyî de yew bi yew şonî heqîya xo. Nînan ra yew zî Ahmet Fîdano 110 serreyî yo. Ahmet Fîdan wextê qetlîyamî de ameyo wezîfe kerdene ke heme keyeyan bikirêşo herêmanê bînan. Fîdan problemê hişî cuyeno û zaf nêro ey vîr zî qaso ke yeno vîrê ci, qala qetlîyamî keno. Fîdan qezaya Qisle ra girêdaye dewa Dereova de roşeno, o wext yew bi yew şahidîya heme çîyî nêkero zî, zano kam kura de ameyo qetil kerdene û bi vatişê keyeyê xo ra zano ke ewja de se bîyo. Seba ke qezaya Pîlemurîye de goreyê qezayanê bînan qetlîyamî hîna kêmêr bîyî, keyeyî û domanî kirişîyayî ewja. Fîdan vano ‘ez nê erdan de bîya û ez do nê erdan de bimira’. Xerîban sey ajanî vîneno Fîdano ke dewa xo de pîl bîyo, bi qiseykerdişê xo rîyê dormeyê xo dano huyayene. Fîdan hetê hişî de zehmetîye bianco zî, tesilî dormeyê xo rê qala qetlîyamî keno. Wexto ke qala qetlîyamî keno, bîbikê çimê ey de dejê qetlîyamî yenî dîyayene. Fîdan ge-ge xo bi xo vano ‘ez qisey kena, labelê nê ajan yan zî merdimê dewlete nêbî? Nê ameyî ke mi bîşêrî’ û xemgîn beno. No zî nîşan dano ke yê ke qetlîyam ra derbaz bîyî, senî mîyanê ters û dejî de cuyenî. Hetê dejî de nîşan dano ke bawerîya nê kesan dewlete rê nêmendo.” Wazenî wa bierzî zîndan Herçiqas ke Fîdan terseno û ewleyîya ci dewlete rê çin a, labelê reyna zî vano ‘Ez do vaja, wazenî wa bierzî zîndan’ û nîşan dano ke o çîyê ke benî ra bêxebere nîyo. Fîdan nizdîyê 3 saetî qala qetlîyamî kerd û wextê vatişî de çimê ci hesirî bîyênê. Fîdan dano zanayene ke tena dewa Ramazanî de nizdîyê 90 kesî ameyî qetil kerdene û bi hawayo ganî ameyî veşnayene. Pîzeyê cinîyanê diganîyan ame qelişnayene Fîdan va ‘wextê qetlîyamî de qezaya Pîlemurîye de merkezê arêdayîşî ameyî awan kerdene’ û wina domna: “Mi zî xeylê extîyar, doman û cinîyan piştîya xo de kirişt û mi berdî ewja. Labelê reyna zî qezaya Qisle de nizdîyê hezar kesî ameyî qetil kerdene. Pîzeyê cinîyanê diganîyan ameyî qelişnayene û bebekê înan ameyî vetene û qetil kerdî. Seba ke guleyê înan nêqedyî, merdimanê bêpawitişan zî bi hawayo ganî sungî kerdî û veşnayî.” Fîdan qiseykerdişê xo de tim tim vano ‘na dinya seba zaliman cenet, mazluman rê cehenem a’ û bale anceno şero ke welat de dewam keno ser. Herçiqas ke emrê ci 110 serreyî yo zî, wazeno ke wa aştîye awan bibo. Fîdan bi hawayo aktîf rojeve taqîp keno û vano ‘çîyê ke ewro yenî cuyayene, wextê qetlîyamê Dêrsimî ra ferqê ci çin o. Serekkomar Erdogan zulmkar o û ewro zulmî dano domnayene.”