Li aliyekî Serokwezîr Recep Tayyip Erdogan diyar dike ku malbatên PKK'ê bi zarokên xwe re hevdîtinê pêk tîne û tu astengî li pêş hevdîtinê tune. Li aliyê din jî bi hincetên cur be cur hevdîtina malbatan a bi girtiyan re tê astengkirin. Li gel gotinên Serokwezîr Erdogan, parêzerên Rêberê PKK'ê Abdullah Ocalan 70 roj û malbata Ocalan jî 6 mehin nikarin bi Ocalan re hevditinê pêk bînin. Her wiha 5 girtiyên PKK'ê ku li Girtîgeha Tîpa F a Îmraliyê tên girtin jî 6 meh in nikarin bi malbatên xwe re hevdîtinê pêk bînin û ji hemû mafê xwe yê ragihandinê hatine dûrxistin.
Malbatan, diyar kir ku di serî de mafê hevdîtina saetekê ya bi parêzeran re daxistin nîv saetê û niha jî 6 mehin hevdîtin asteng kirine. Malbatan, anîn ziman ku ji 27'ê tîrmehê heta niha mafê ragihandinê yên girtiyên PKK'ê Şeyhmuz Poyraz, Cumalî Karsu, Hakki Alkan, Hasbî Aydemîr û Bayram Kaymaz ji destê wan hatiye girtin û nikarin mafê xwe yê telefon û nameyan bikar bînin.
'Ji bo her hevdîtinekê em 2 rojan mijûl dibûn'
Dayika girtiyê PKK'ê Bayram Kaymaz, Medîne Kaymaz a li Îzmîrê rûdinê, anî ziman ku heta 6 meh berê pir bi zor û zahmetî diçû hevdîtinê û ji bo hevdîtinê pêk bîne herî kêm 2 rojan mijûl dibûn. Medine Kaymaz, destnîşan kir ku berê jî tecrîdek li ser wan hebû, lê 6 mehin qet nikarin biçin hevdîtinê pêk bînin û hemû mafê wan ê ragihandinê ji destê wan hatiye girtin. Kaymaz, anî ziman ku heta dawî ew dê li zarokên xwe xwedî derkevin û wiha got: "Me bikujin jî û têxin bin axê jî em dê li zagorên xwe xwedî derkevin. Niha ji bo hevditina nîve saetê li me zulimê dikin û destûrê nadin hevdîtinê."
'Bi dijwarî li ser me digeriyan'
Kaymaz, bilêv kir ku dema diçûn hevdîtinê bi dihan caran li ser wan lêgerîn pêk dianî û lêgerînek gelek dijwar pêk dianî. Kaymaz, da zanîn ku dema diçûn hevdîtinê li aliyekî hezar zahmetî ji wan re derdixistin û li aliyê din dengê wan tomar dikirin û yek bi yek li wan guhdar dikirin. Dayika Kaymaz Menîne Kaymaz, derbirî ku ew dê tu carî zarokên xwe bi tenê nehêlin û heta dawî li wan xwedî derkevin.
'Ev der girtîgeha Îmralî ye'
Kaymaz, bibîrxist ku dema diçin hevdîtinê jî ji aliyê rayedarên Girtîgeha Îmraliyê ve rastî pêkanînen derûnî tên û li wan neheqî te kirin. Kaymaz, da zanîn ku dema bertekên xwe tînin ziman jî rastî bersîva "Vir girîgeha Îmraliyê ye" tên. Medîne Kaymaz, diyar kir ku 6 mehin bi kurê xwe re hevdîtin pêk neaniye û wiha got: "Erdogan dibêje kezeba min dişewite. Lê destûr nade ku em bi zarokên xwe re hevdîtinê pêk bînin. Ên kezeba wan dişewitin em in, ne ew e."
FERHAT ÇELİK/ÎZMÎR