Enê kombiyayişî de her 2 hetan niyetê qandê çareserîn eşkere kerd. Wija 10 xalê ki Rayverê Şarê Kurd Abdullah Ocalanî qandê muzakereyan kerdîbî hedre, vejiyay ravey.


Ê 10 xalê Ocalanî kerdê hedre jî winayê:

1- Siyasetê demokratîk; îzahkerdin miyanê ci.

2- Îzahkerdinê taybetiyê netewî û xocayî ê çareserînê demokratîk

3- Temînatê demokratîk û qanûnî ê welatiyijê azad

4-Eleqeyê siyasetê demokratîk ê bi dewlet û şariya û sernameyê sazîbiyayişî

5- Taybetiyê sosyalî û aborî ê çareserîn

6- Çarçiweyê ewlekarîno ki, bi demê çareserîna vejiyo werte

7- Çareserîn û temînatê qanûnî ê meseleyê ceniyan, kultur û ekolojîk

8- Temînatê makanîzmayê jûwîn, demokratîk û pluralîst ê qandê îzahkerdinê kamiyîn

9- Îzahkerdinê Komarê Demokratîk, Welatê hetpar, milet bi prensîbanê demokratîk û temînatê înan ê qanûnî.

10- Û Destûra Esasiya ki, nînan pêrin hezim kena û vurnayinê demokratîk esas gena.


Erdogan hewl dano sabote bikiro

Enê 10 xalê Ocalanî û kombiyayşê heyeta HDP û hukumetê AKP, atmosferê rind xoya piya ard. Ûmûdê çareserîna meseleya kurd û demokratîk-kerdinê Tirkiye kerd vêşî. Badê beyanê niyetê rind ê Ocalanî, heme çimî açariyay AKP û dewleta tirk ser. La belê AKP û dewleta tirk zey, goreyê wasten û pawetina şaran hereket nêkerd û nêkena. Wexto ki atmosferê aştî bibê vêşî, serokkomarê tirk Tayîp Erdogan dest bi sabotekarîn kerd. Erdoganî verî ancî pirêskiya layê siyasetê înkarî û vat ki, Tirkiye de meseleya kurd çiniya. Bado jî vejiya vat ki, "heyeta çimdarîn nêbena" û kombiyayişê Saraya Dolmabahçe jî şaş bi.


Demîrtaş: Sebebê krîzî qerardarînê Ocalan'o

Enê vatenê Erdoganî krîzê miyanê AKP de da tever.Vatoxê hukumetê AKP Bulent Arinç vera vatenanê Erdoganî vengê xo kerd berz û ard ziwan ki, ê qandê heyeta çimdar qerardarê. Arinçî qiseyê Erdoganî zey, qiseyê zirar danê hukumetî hesibinay û vat: Wayirê mesûlîn hukumet o. Erdogan wina qiseykerdina hem zirar dano xo û hem dano hukumetî. Hevserokê HDP Selahattîn Demîrtaş jî alozînê miyanê AKP serro DÎHA rê qisey kerd û vat: Alozînê miyanê AKP de, qandê Tirkiye, çiyê rind û xeyr o. Demîrtaşî eleqe ant sebebê krîzê miyanê AKP ser û vat: 'Serkewtinê Kobanê, qerardarînê Ocalanî û hamleyê Hereketê Azadiyê Kurd, alozînê miyanê AKP de kerdê xorî.  


 NAVENDA XEBERAN