Hemsereka Şaredarîya Qelqelîya Wanî Handan Bagciye wexto ke şîyêne çalakîya tirso ganî bi îdîaya ‘mukavemetê polîsan’ kerdo, ameybî tewqîfkerdiş. Bagciya ke 15 aşmî yo ke tewqîfkerde ya, heta nika îdîanameya aye nêameyo amadekerdiş.
Pawitoxê Bagciye Yildirim Ayazî vist vîrî ke ‘Bagciye seba ke kesî nêmirî şîybî cayê operasyonî, la demê agêrayîşî de hetê polîsan ra bi derbkerdiş ameybî tepiştiş’ û qiseykerdişê xo wina domna: “Her çiqas ke Bagciye ameybî veradayîş zî netîceyê îtîrazê dozgerî de ameybî tewqîfkerdiş. Wextê tewqîfkerdişê Bagciye de ma îtîrazê Serdozgerîye kerd û Serdozgerîye zî îtîrazê ma qebul kerdbî. No zî yeno manaya îtîrafkerdişê bêsucbîyayîşê Bagciye. Aye roje ra dima ma seba tewqîfkerdişî îtîraz kerd, la nêame qebulkerdiş.”
Suc nêame vînayiş
Ayazî va ‘Her çiqas ke orte de sucêk çinêbo zî mehkema prosesê akerdişê dosya zaf derge kerde’ wina qedêna: “Netîceyê îtîrazê avûkatan de dozgerî dosya ancax peynîya 6 aşman de amade kerd la mehkeme dosya de ti suc nêdî û dosya peyser dozgerî rê erşawit. Labelê mehkeme şînayêne serbest verabida. Nika Bagciye kamcîn sucî ra ceza bigiro zî cezaya xo qedênaya. Labelê orte de çîyo ke bişînbî ceza biderî, çin o. No qerar sîyasî yo; çimkî seba tayînkerdişê qayûmî no dem hende ame dergkerdiş. Reyna Bagciye nizdîyê 7 aşman mîyanê hepsîyanê edlîyan de mende. Heyetê mehkeme yê ke Bagciye tewqîf kerdî zî nika doza FETOyî ra tewqîfkerde yî. Ganî Bagciye bi hawayo leze serbest bêra veradayîş.”
ANF / WAN