Hêzên YPG'ê li gundê Girhokê yê girêdayî Girkê Legê li dijî navendek komên çete çalakî lidarxist. Di encama çalakiyê de yek ji wan fermandar 10 endamên komên çete hatin kuştin. Li Til Ebiyadê jî komên çete êrîşî gundê Susikê kirin, lê di encama bersivdayîna YPG'ê de 9 êrîşkar hatin kuştin. Li bajarê Hesekê jî hêzên rejîmê xwestin bikevin herêmê lê rastî berxwedanê hatin.
Hêzên Parastina Gel (YPG) şevê berîn li herêma Girkê Legê, li gundê Girhok ku wekî baregeha çeteyên El Nusra û hin çeteyên Artêşa Azad tê bikaranîn û ji vir êrîşan pêk tînin, çalakiyek bi bandor lidarxist. Hat ragihandin ku di çalakiya saet di 19.00'an de dest pê kir û heta 20.30'an dom kir de pevçûnên dijwar qewimîne û koma Liwa El Tewhîd a Artêşa Azad jî di pevçûnan de cih girtiye.
Li gorî agahiyan di çalakiyê de navenda çeteyan hat hilweşandin û yek ji wan fermandar 10 endamên komên çete hatine kuştin. Hat ragihandin ku piştî çalakiyê pevçûn heta serê sibehê cih bi cih dom kirine.

Li Til Ebyad şerê dijwar


Li bajaroka Til Ebiyadê jî şevê berîn saet di navbera 02.00 û 03.00'an de komên çete êrîşî gundê Sûsika Mezin ya li ser xeta sînorê bakurê Kurdistanê ye û 7 kîlometre dikeve rojavayê Til Ebiyadê kirin. Li ser vê yekê hêzên YPG'ê bersiv dan êrîşa çeteyan û di encama pevçûnan de, 3 wesayît hatin rûxandin û 6 êrîşkar hatin kutşin. Piştî pevçûnên komên çete neçar man ku xwe paşve vekişînin.

Êrîş hate rawestandin


Hat ragihandin ku di saetên serê sibehê de jî heman koman careke din xwestin êrîş pêk bînin, lê hêzên YPG'ê bersiv dan û pevçûn derketin. Di encama vê pevçûnê de jî 3 çete hatin kuştin. Hat gotin ku êrîşkaran xwe paşve kişandine, lê vê carê bi topên hawanê êrîş pêk anîne.

Navenda Çapemeniya Yekîneyên Parastina Gel (YPG) diyar kir ku di 3 rojên dawî de hêzên rêjîma Baasê di nava hewldanan debû ku taxa Şêxmeqsûd dagir bike. Di berdewama daxuyaniyê de hat destnîşankirin ku hêzên rêjîmê di 3 rojên dawî de ji herêma Mexselet El Cezîre êrîş pêk anîne û dixwest bikeve taxê û ev tişt hat gotin: “Hêzên YPG/YPJ’ê  bersiva êrîşan dan, di encamê de 5 leşker hatin kuştin û gelek jî birîndar bûn û hêzên rêjîmê neçar man paşve vekişin.” 


TIRBESPIYÊ/EFRÎN