Fermandarînê Qerargehê Merkezê Pawitenê Şarî bi wesîleyê 12. serraçarnayişê hemleya 1ê Hezîrane damûsnayin da û aşkere kerd ke îye dê serra 13in açarnê hemleyê girdî.
Damûstayîn de Fermandarî hemleya 1ê Hezîran fîraz kerd û şehîdê azadî ard vîrî. Fermandarî ard ziwan ke, hemleya 1ê Hezîran 2004î, dûştê êrişanê çinkerdişî yê dewleta tirk demê aktîf yê pawitenî bi. Damûstayîn de vajîya ke bi na hemle cewabê gird dîya dewleta tirk.
Fermandarîn vist vîrî ke gerîla bi na hemle rayverînê demê neweyî kerd, vernîyê siyasetê çinkerdişî ê dewleta tirk girot û dazonayen ke gerîlayan tekoşînê serbestî yê Kurdistanî, bi hunerê xo yê lej û taktîkanê newî, Zagrosan ra hetanî Amanosan û Zeryayê Sîya tekoşînê azadî kirêşto sahaya hera. Bi na têkoşînî çareserîyê meseleya kurd ferz kerdo.
AKP bi taktîkî nezdî bî
Fermandarîn peynîyê têkoşînê na hemle ser zî wina vat: “Her çiqes, tekoşînê ma, dewleta tirk a îşgalker çend finî (reynî) ant maseyî ser zî, la belê dewleta bi rayverînê AKP de, her tim bi rengê taktîkî nezdî bî û her finî konseptê serdestkerdişê sîstemê îşgalker esas girot.”
Fermandarînê Qerargehê Merkezê Pawitenê Şarî ard ziwan ke gerîla vera êrişan bi rihê hemleya 1ê Hezîran xo ver dayo û wina dewam kerd: “Rihê na hemle tenya Bakûrê Kurdistan de nê, tesîrê parçeyanê bîn zî kerd. Vera êrişanê wehşî yê xeta DAIŞ û AKP, Kobanê, Şengal, Mexmûr, Kerkûk, Sûr, Cizîr, Nisêbîn û cayanê bînan ê Kurdistanî de, xeta raşt yê xoverdayişî vet werte. Na rastîn zî, qandê (serva) heme şarê ke bi çinbîyayişî ra rî bi rî yê bi omidê gird.”
Gerîla xoverdayişî kena berz
Merkezê Pawitenê Şarî eleqe ant mihîmiya nika ê hemle ser û wina vat: “Dewleta tirk vera xoverdayişê girdî, biya xînt (bome) û har. Coka heme hetan ra êriş kena, barbarî û wehşetî de sînoran nêsilasnena. Komkiştenan virazena, sûkanê Kurdistanî rijnena û talan kena. Nê kerdenê dewleta tirk zî damusnenê ke, emrê îşgalkeranê dewlet biyo kemî. Gerîlayê tekoşînê serbestî yê Kurdistanî û şarê Kurd, vera siyaseta barbar û wehşetî yê dewleta tirk, sûkan û koyan de xoverdayişê xo berz bikero, serra 13in ê hemleya 1ê Hezîranî açarno hemleya newî yê gird.
Rihê 1ê Hezîran AKP visteno war
Derheqê hemleya 1ê Hezîran de jû damûstayîn zî Hevserokîna Konseya Rayverîn ê KCK ra amê. KCK aşkere kerd ke rihê hemleya 15ê Tebax û 1ê Hezîran AKP zî fîneno bin, Kurdistana Azad û Tirkiye ya demokratîk vejeno werte.
Hevserokîna Konseya Rayverîn ê KCK bi wesîleyê 12. serrraçarnayinê hemleya 1ê Hezîrane de damûsnayin da û eleqe ant muhîmiya hemle ser. KCK sernî de şehîdê hemle ardî vîrî û vat: “Qehremanê hemleya 1ê Hezîran, wexto ke dişmenî vatê tesfiye bî, hinî nêşenê werzê pay, bi tecrube û xoverdayişê girda, ferqê gerîlayan mûsna pêrinê dinyay.”
KCK vist vîrî ke Rayverê Şarê Kurd Abdullah Ocalan’î û Hereketê Azadîyê Kurd, wextoke AKP newe bî îxtîdar aya kerde la AKP goş nêda û wina vat: “Erdogan û AKP bi vatena “Eke mefikrîyê meseleya kurd çinya” cewab dayê waştenanê azadî. Emel kerdî ke, hinî gerîla nêşeno çiyê bikero. Emel kerdê ke, gerîla tsfîye bîyo. AKP û quwetê komploker ê ke Rayver Apo esîr girewtî, plan kerdî ke zerre ra Hereketê Azadî lete bikerê û vernîyê hemleya 1ê Hezîran bigîrê. La belê qe jew zî nêşa vernîyê hereketê azadî bigîro.”
Gerîlayan hesabê dewlet xeripnay
KCK eleqe ant destkewtinanê hemle ser û vat: “Gerîla wextê kilmî de derbeyê girdî day quwetanê tirk ro. Hesabê dewleta tirk xeripnay. Coka hikumeta AKP Serokînê Tayîp Erdogan'î de, qandê (serva) adirbirnayinî serpirodayişê Hereketê Azadî kerd. Hereketê ma tebaxa 2005î de şansê çareserîn da û adirbirnayin îlan kerd, la belê AKP û dewleta tirk, raşt nezdî nêbî û o firsed zî herimna.” Hevserokîna Konseya Rayverîn dazonayen ke hemleya 1ê Hezîran, serkewtişê gird veto werte û fina bîn îspat kerd ke, qe jew quwet nêşeno gerîlayê kurd û hereketê azadîyê kurd tesfîye bikero.
KCK eleqe ant siyasetê komkiştenan hikûmet yê dûştê Vakurê Kurdistanî ser û vat: “Erdogan vera kurdan îtîfaqê newe viraşto. Bi heme mutefîkanê xo yê faşîst êrişan keno. Seweta ke Hereketê Serbestî yê Kurd tesfîye bikero, heme quwet û îmkanê dewlet seferber kerdê. La belê rihê hemleya 15ê Tebax û 1ê Hezîran, do Erdogan û AKP bin bifîno, Kurdistana azad û Tirkîye ya demokratîk vejo werte.
NAVENDÊ XEBERAN