2 hepsîyî demêko derg ra dima tehlîye bîyî

Badê ke bi nameyê Abdullah Altûnî de hepsîyo ke 24 serrî ra pey tehlîye bi, vizêr hepsîyêko bîn zî tehlîye bi. Hepsîyo bi nameyê Sedat Gorenço ke 19 serrîya xo de dekewtbi zîndan, vizêr tehlîye bi.

Mehkemeya Qanûno bingeyî seba ke wextê mehkemekerdişê Gorençî de heyetê hakiman mîyan de endamêko leşker est bîyo, qerarê newe ra mehkemebîyayîşî dabi. Gorenç 19ê Adara 1995î de dekewtbi zîndan û bi dore rey zîndananê Amed, Dîlok, Çewlîg û Çankiri de mendbi.

Seke yeno zanayene Altûn zî qerarê Mehkeme ra serrêk ra dima tehlîye bibi. Dima ra Gorenç zî muracatê Mehkemeya Qanûno bingeyî kerd û muracat ra 14 aşmî ra dima Mehkeme ra qerarê tehlîye vejîya. Gorenç 19 serrîya xo de kewt zîndan û 43 serrî de vejîya. Gorenç Zîndanê Çankiri ra tehlîye bi û xeylê kesî ameyî ci vera.

Çabadak zî 28 serrî ra dima tehlîye bi

Heto bîn ra Hepsîyo bi nameyê Hasan Çabadako ke 28 serrî verê amebi tewqîfbîyayene, tehlîye bi. Çabadak serra 1992î de bi îdîaya ‘parçekerdişê welatî’ cezaya muebbedî girewtbî. Seba Çabadakî Mehkemeya Cezaya Girane ya 6. de newe ra mehkeme ameye viraştene û qerarê tehlîye vejîya. Çabadak qerar ra dima Zîndanê Tîpa Dyî yê Amedî ra tehlîye bi û keye û embazê ci şîyî ci vera.

AMED