Di sala 2012'an de binçavkirin, girtin û sirgûna girtiyan derket asta herî jor. Sala 2012'an ji bo girtiyan bû sala sirgûnan. Polîtîkaya sîrgûnê ya li girtîgehan bi taybet jî piştî çalakiya grêva birçîbûnê ya girtiyên PKK û PAJK´ê kiribûn, tundtir bû. Dewleta Tirk bi zext, êşkence, sîrgûn û binpêkirina mafên xwest tola greva birçîbûnê ji girtiyan hilîne. Di nava salekê de bi hezaran girtî hatin sirgûnkirin. Di rojê 5 girtî hatin sirgûnkirin. Girtî bi hinceta ku di girtîgehan de cih tune sirgûnî bajarên Tirkiye yên bi hezaran kîlometre dûr kirin. Girtiyên hatin sirgûnkirin rastî lêgerîna tazî û îşkenceyê hatin. Mafê wan ê hevditinê hat binpêkirin û rastî cezayê hucreyê hatin. Hevdîtina wan a vekirî hate qedexekirin. Malbatên ku ji bo hevdîtinan çûn bi hezaran kîlometre rê çûn, rastî neheqî, binpêkirina mafan hatin, bi lêdan û gefan re rû bi rû man. Gelek caran mafê wan ê hevdîtinê hate binpêkirin û bêyî hevdîtinê bikin vala vegeriyan.


Malbat nikarin biçin hevdîtinê
Girtiyê bi navê Zulkuf Gezen ê 24 salî ku di sala 2007'an de li Amedê hat girtin rastî cezayê muebetê hat û salek berê sirgûnî Girtîgeha Tîpa L a Giresunê hate kirin. Bavê Gezen Şehmuz Gezen diyar kir ku di salekê de tenê 2 caran hevdîtin pêk aniye û ji bo hevdîtina saetekê 613 kîlometre rê çûye. Gezen, da zanîn ku bi sirgûnan hem zarokên wan mexdûr dibin û mafê wan tê binpêkirin û hem jî ew mexdûr û şerpeze dibin. 

ÎHD: Girtî 2 caran tên cezakirin

Serokê Şaxa ÎHD'ê ya Amedê Racî Bîlîcî jî anî ziman ku bi sirgûna girtiyan mafê girtiyan tê binpêkirin û 2 caran tên cezakirin. Bîlîcî, anî ziman ku bi piranî girtiyên siyasî tên sirgûnkirin û di rê de û di ketina girtîgehan de dîsa rastî binpêkirina mafan, lêdan û îşkenceyê tên. Bîlîcî, da zanîn ku hem girtî 2 caran tên cezakirin û bi sirgûnan re malbat jî tên cezakirin û bêtir mexdûr dibin.

Di salekê de 2 hezar sîrgûn
Di salekê de zêdeyî 2 hezar girti sirgûn bûn û di rojê 5 girtî hatin sirgûnkirin. Piraniya girtiyan sirgûnî Derya Reş, Ege û Marmarayê hatin kirin. 

DÎHA/AMED