Şêwaz de 23 serre raver, 2 temmuze 1993yine de jêdêrî alewî 33 roşnvîr, nustox û hunermendî kişîyayî. Na qirrim de di tenî karkerê otelî merdî û di tenî kî gonewerî geverbî. Waxtê serekwezîrêna Tansu Çîller bî. Erdal Înonu kî(zî) ebe partîya xo SHP ortaxê hukmatî bî. Goneweran deva-deve heşt saete ebe gilej û teftir dormê otelê Madimakî çarnayîbî. Hondê saete kes ra veng nêvejîya. Na hewadîs çîyo ro qolay nîyo, çike dewlete ebe polîs û leşkeranê xo heşt saete no adir seyr kerd.
Ewro eskera yo ke na qirrim de bêçika dewlete bîya. Ma zanitêne, hama nika dewlete ra tayîne kî no kerd areze. Sevev çik bî, kamî na fermanê qirrkerdîşî dayîbî? Gereke pêro bivejîyê orte. Kamî ke na qirrkerdîş de bîyê, gereke hesav bidê. Ma eke na persê cavan(cuwaban) dima(badê) ke meşerîme, serre be serre some Şêwaz zirçeme, çîkeme peyser yeme. Tayê serrî walîyan yad kerdene rê bîla qedexe(yasax) ard, gazo îsotin sanit alewîyan ser. Ewro kî tersê alewîyan dewam keno. Çike kam ke ferman do, ê hona orte nêvejîyê. Serekwezîra serdestî(hukmatî) Tansu Çîllerî, qirrkerdîş ra dima vatîbî; “ Mileto ke tevera bîyo, înan rê tawa nêbîyo. Teselîya ma na wa.” Yanê vana; Heqo sikir, adir wekerdoxan rê tawa nêbîyo. Madimak de cawo ke adir wekerdîbî uca 16 serre, hata 2009 lokontawa kebab bîbî. Yanê, cawo ke însanî kişîyîbî uca goşt werîyêne. Tayê gonewerê neweyî kî şîyêne uca ebe bêçike xo lîştayîş, goştê meyîtan werdêne. Serdest, 2011 de Madimak kerd “Merkezo Zanîşte û Zagon.” Ma waştêne ke uca, muzeya serm bo, hama hen nêviraşt. Neyra kî nêmendî, di gonewere ke vêsê, nameyê înan kî ortê şêhîdan de nusto. Henî kî nameyê juyî, name pêro şêhîdanê ma ser de nusto. Yanê ma ra vanê; “Sima rînd ke kişîyê.” Destê ma ra ke bêro, ma ewro kî sima kiseme. Verên ra hata nika rayşîyayîşê Şêwazî de alewîyan, tayê sloganan de vanê; “Dewleta ke goneweran rê seyrkera, a dewlete, dewleta ma nîya.”
Her(heme) serre, her ca ra alewîyî yenê Şêwazî. Hama tayê alewîyê ma, hona tayê çîyan ser nêkutê. Cemxanewo Alî Baba de fotografê ke darde kerdîyê înan ra kî eskera yo ke qafika tayîne têhurekerdîya. Ju(yew) ca de Pîr Sultan, ju ca de Hz. Elî, ju ca de kî Hace Bektaşi Welî darde kerdîyo. Zaneme ke nê wayîrê raa mayê. Hama ortê nînan de kî fotografê Atatirkî darde kerdîyo. Mi no hal ke dî xo be xo vake; “Atatirk key bîyo wayîrê na raye.” Çîyo nîyanen ê bînî ke bivirazê, vanê; “Niyade îbadetxane de sîyaset virazenê.” Ma no karê ma çik o? No sîyaset nîyo? Zerê îtîqatê ma de sîyasetê dewlete rê ca çîn o. Alewîyî ke kunê cemxane, her çî tever ra verdanê ke can bibê. Endî bizanîme ke na dewlete ma de haşt nîya. Ma ke se bikerîme, ma de têlewe nîna. Qoçgîrî de, Dêrsim de, Mereş de, Çorim de, Şêwaz de, Qazi de ke ma rî çi lêheq dîyo, ewro kî çîyo jêde nêwazena.
Alewî gereke demoqrat bo, roşnvîr bo, zulimkaran ra çîye mewazo. Sevevê qirrkerdîşê Şêwazî, bizanîme ke dewlet a û serdest o. Dawaberê(verfekê) goneweran rê ke nîyadîme, fam keme Madimak tayîne rê çik o? Dawaberê goneweran juyî C. Mumtaz Akıncı, ewro Mehkemeyo Qanûno Bingeyî de azawo û qayitê dawaya Madimakî beno! Oncîa nê dawaberan ra tayê; Şevket Kazan, Hayatî Yazici serdestî de bî wezîr, 8 tenî kî bî mebus. Dawaya Madimakî, 12 marte 2012yine de darîye we. Hama ma zoneme ke qirrîmê Madimakî sucê însanîye ra wo. Ser ra, 100 serre şêro kî derdê ma wo. Ewro dawa ma hona dewam kena, hama zayndarê dawayî, odayê dawaberanê ma de sae benê! Yanê, pê ma kay kenê. Ma alewîyî serva îtîqatê xo kes rê dismenên nêkeme, hama endî dismenanê xo rê vile xo kî derg mekerîme. Çike dawaya Madimakî, endî dawaya anor a!