2012 de xiraviye biye û na xiraviye 2013 de zî devam bikero.

Dîna de biye na xiraviye, welatê ma de zî. Emperyalîstan bi herbê dîna yê 3îne bare kerdena dewlemendiya ser- û binê herdî devam kerd.
Taye na xiraviye bi name “wisarê Ereban” name kenê. Hama raştiye de emperyalîzm kam ke hetkarê ey niyo, ya zî endî besenêkeno emperyalîstan rê rind xizmete bikero, ey vurnenê, dêmdanê. Mesela wisarî zurode girs o.
Welate ma de zî hukumat û dewleta tirk ya terorîste verva kurdan zulm û zorvajiya xo kerde jede. Her het ra mexmuriye, zor kar ardene, înkar, riznayene û asîmîlasyon ramit. Dewlet û hukumatê terorîste yê tirkî, metodê herbê qilêrin yê Tansu Çîller hebena kerdî hîra û polîtîka ‘tek tek...’ xorê kerde qilawiz.
Serekterorîstî kerd eskera ke mesela kurdî endî ‘qediya’
3 rojî 2012 ra avê zulmê dewleta terorîste bi Tertelê Roboskî dest kerd ci. Zimistanê 2012 de operasyonanê eskerî de, fermandaranê serekterorîstî verva gerîllayan qazê kîmyasalî ardî kar. Bêdlîs Xîzan de 15 cenikê kurdîstanizî ameyî qetil kerdene. Yanê qetilkariya dewleta faşîste kistene de şîndor nasnêkerd.
Serekterorîstî her qetlîam ra dime, qetilkarî kerdî pîroz û cirê berxûdariya xo vate. En peyecoy zî hukumatê terorîstî pêskar nêbiyayena mebusanê BDP kerde rojdem.
Verva hukumat û dewleta terorîste qomê kurdî zî xoverdayîsê girşî dayî. Kurdistanizî her caye dîna de, verecoy Kurdîstan û Tirkiya de, Avrupa de zî payra bî. Xêle şîyayîs û numayîşî viraştî. Mordem şîkîno vazo, jû roza kurdan bê xoverdayîs ranêvêrde.
Xoverdayîsanê kurdan dewleta terorîste kerde xînt û har. Wezîrê karê zerrî yê serekterorîstî, Îdrîs Naîm Şahîn, Newroze kerde qedexe. La qomê kurdî bi 100hezaran vejiya cade û zuzaqan, qedexê dewleta faşîste guret binê lingan, Newroza xo kerde bimbarek.
Gorê hukumat û dewleta nijadpereste, gerîlla endî ver bi qediyayene şîyenê. La gerîlla, wisar Kurdîstan de hukum guret xo dest. Taye hereman de weşîye dewleta faşîste rê kerde zehîr û zuqqum, eskerî qereqolan de kerdî mehkum.
Nî rozanê peyenan de serekterorîstî nîsanê polîtîka xo yê serra 2013 dayî. Domonê ke Roboskî de ameyî qetil kerdene, jê ‘qilixê sîvîlan de terorîstî’ îlan kerdî. Qeseykerdîsê xo yê Oda Sanayî yê Anqara de, devamê herbê qilêrîn îlan kerd û nijadperestiya xo onca bi çekuyanê ‘tek welat, tek milet, tek desmale’ homete rê kerde eskera.
Kurd zî 2013 de herhal de ney ra vanê ‘ey nijadperest, ey serekterorîst, ma miletê to nîme!’
                ***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.