Xoser WELAT
Weçînayîşanê 24’ê Hezîrane rê 12 rocîy mendîy. Peynîya weçînayîşan senî bena wa bibo, do Tirkîya de serdemêko newe dest pêbikero. Çi hewle û çi xirabe ser, do Tirkîya de vûrîyayîşê esasî pêk bêrê. Feraset û konjuktorêy ke seserre raver, bibî hîmê awanbîyîşê dewleta tirke, ewro nê zerre, nê herême û nê zî dinya de çîn yê.
Vûrîyayîşo civatî zehmet o. Bitaybetî zî di Rochelato Mîyanên de. Seba nayê êş û dejê pîlîy pêk yenê. Di binkeya nêy êş û dejan de, ferasetê verva vurîyayîşî est o.
Dewleta tirke di şexsê Erdoganî de waşt seserrêka bîne zî bi goreyê heşmendîya Îttîhat Terrakî ya serranê awanbîyîşê komare bidomno. Vatişê AKKP-Erdoganî yo “2023 û 2071” ke heme weçînayîşanê na ra verî de slogano esasî yê AKKP-Erdoganî bi, ziwanardişê ney ferasetî bi. Gere persgiraya kurde bi ferasetê serranê badê awanbîyîşê Komare, biamêne çareser kerdene. Erdogan zî seba naye peyayo tewir çimsûr û kêrameye bi.
Heme hêzêy legal û îllegalîy êy Tirkîya, na plane de pey Erdoganî de bîy. Betalkerdişê weçînayîşanê 7’ê Hezîrane û bêvengîya verva referandûmê 16’ê Nîsane, bi na hetkarî û paştîdayîşî, kewtî merîyete. Pergala Mîyannetewî zî heta peynî paştîye daye ney ferasetî. Bêvengîya mîyannetewî ya verva kerdenanê Erdoganî êy Vakûrê Kurdistanî, bi no sebeb bi. Şarê Kurdî bi bedêlê giranan û xoverdêrîyêke tarîxî, na plana bi perrêkê xo mîyannetewî têk berde. Perro bîn de hewesa dîktatorî ya Erdoganî seba Pergala Mîyannetewî zî bi talûke.
Vûrîyayîşê welatan de hîmê esasî, dînamîkê zerreyî yê. Mudaxeleyê teberî benê sebebê kaos û qeyranê zafêrî xiraban. Sûrîye, Îraq, Lîbya û cayê bînîy finakê verbiçimîy êy na raştîye yê. Tirkîya hem bi serhûmar û hem zî bi muhîmîya xo ya jeopolîtîke, nêy welatan ra cîya ya. Kaosêko zê Îraq, Sûrîye û welatê bînan di Tirkîya de, ro hesabê pergala Mîyannetewî zî nîno.
Her çende feraseto civatî yê Tirkîya ferasetêko ecêb û cîya bo zî, rewşa AKP-Erdoganî ya weçînayîşanê 24’ê Hezîrane başe nîya. Rewşa aborî, sîyasî û civatî ya zerreyî, reyna polîtîkayê bi dewletanê herême û dinya reyde, vûrîyayişî ro Tirkîya ferz kenê.
Na ra ver weçînayîşê 7’ê Hezîrane û Referandûmê 16’ê Nîsane zî te de, heme weçînayîşan de seba ke paştîdayîşê xo yê bi Erdoganî reyde eşkera bikerê, miheqeq yew-didi serokwezîr, serok dewlet yan zî rayîrberê payeberzîy êy Ewropa û Amerîka ameyêne Tirkîya.
Na kahneşopî di nêy weçînayîşî de pêk nîyamî. Heta welatanê Ewropa de propaganda kerdiş zî ro AKP-Erdoganî ame qedexe kerdene.
Reyna derûnîya Erdoganî ya ke eysena zî, na rewşe başêrî nîşan dana. Heme weçînayîşanê na ra verî de, rojdeme tim hetê Erdoganî ra ameyê dîyar kerdene. Erdoganî qisey kerdê û muxalefetî cewabê Erdoganî dayêne. Ewro tweetê Birêz Demîrtaşî yê zîndanê Edîrne ra, vatişanê Erdoganî ra zafêrî benê rojdeme.
Perro bîn de Muharrem Înce, bi ziwanê Erdoganî ke civatê Tirkîya de derbasdar o, qisey keno û Erdogan neçar maneno ke cewaban biresno Înceyî.
Yanê rojdeme dîyarkerdiş, ke weçînayîşan de esaso kifşker a, hetê Erdoganî ra nê, hetê muxlefetî ra yena dîyar kerdene.
Peynî de nêy heme erênîyan reyde zî çîyêy ke Erdogan bikero, zaf ê. Erdoganî qedera xo, malbate û dormeyê xo, bi nêy weçînayişî ya girê daya. Seba sibaroca xo, dizdî/tirtnayiş ra heta kaos, çi hewce bikero, do hewl bido ke pêk bîyaro. Gere na zaf baş bêro fehmkerdiş. Gere di sere de şaro kurd heme şarêy Tirkîya, bi terzoke heta nika nîyameyo dîyayîş, seba weçînayîşanê 24’ê Hezîrane bixebetîyê.
Bitaybetî welatîyê Tirkîya yê Ewropa, gere zafêrî xo rincan bikerê. Raydayîşî nêverdê roca peyêne û bado ke raya xo bi kar arde ro, kesanê ke rayanê xo bi kar nîyarenê bigeyrê û înan zî berê sindoqan ser.
Vurîyayîş bi dînamîkanê zerreyî pecan o. Seba naye zî 24’ê Hezîrane fersendêko baş dayo dînamîkanê zerreyî. Êdî merîfet, bikarardişê ney fersendî yo. Ya ewro, yan qet nê. 24’ê Hezîrane
Xoser WELAT
Weçînayîşanê 24’ê Hezîrane rê 12 rocîy mendîy. Peynîya weçînayîşan senî bena wa bibo, do Tirkîya de serdemêko newe dest pêbikero. Çi hewle û çi xirabe ser, do Tirkîya de vûrîyayîşê esasî pêk bêrê. Feraset û konjuktorêy ke seserre raver, bibî hîmê awanbîyîşê dewleta tirke, ewro nê zerre, nê herême û nê zî dinya de çîn yê.
Vûrîyayîşo civatî zehmet o. Bitaybetî zî di Rochelato Mîyanên de. Seba nayê êş û dejê pîlîy pêk yenê. Di binkeya nêy êş û dejan de, ferasetê verva vurîyayîşî est o.
Dewleta tirke di şexsê Erdoganî de waşt seserrêka bîne zî bi goreyê heşmendîya Îttîhat Terrakî ya serranê awanbîyîşê komare bidomno. Vatişê AKKP-Erdoganî yo “2023 û 2071” ke heme weçînayîşanê na ra verî de slogano esasî yê AKKP-Erdoganî bi, ziwanardişê ney ferasetî bi. Gere persgiraya kurde bi ferasetê serranê badê awanbîyîşê Komare, biamêne çareser kerdene. Erdogan zî seba naye peyayo tewir çimsûr û kêrameye bi.
Heme hêzêy legal û îllegalîy êy Tirkîya, na plane de pey Erdoganî de bîy. Betalkerdişê weçînayîşanê 7’ê Hezîrane û bêvengîya verva referandûmê 16’ê Nîsane, bi na hetkarî û paştîdayîşî, kewtî merîyete. Pergala Mîyannetewî zî heta peynî paştîye daye ney ferasetî. Bêvengîya mîyannetewî ya verva kerdenanê Erdoganî êy Vakûrê Kurdistanî, bi no sebeb bi. Şarê Kurdî bi bedêlê giranan û xoverdêrîyêke tarîxî, na plana bi perrêkê xo mîyannetewî têk berde. Perro bîn de hewesa dîktatorî ya Erdoganî seba Pergala Mîyannetewî zî bi talûke.
Vûrîyayîşê welatan de hîmê esasî, dînamîkê zerreyî yê. Mudaxeleyê teberî benê sebebê kaos û qeyranê zafêrî xiraban. Sûrîye, Îraq, Lîbya û cayê bînîy finakê verbiçimîy êy na raştîye yê. Tirkîya hem bi serhûmar û hem zî bi muhîmîya xo ya jeopolîtîke, nêy welatan ra cîya ya. Kaosêko zê Îraq, Sûrîye û welatê bînan di Tirkîya de, ro hesabê pergala Mîyannetewî zî nîno.
Her çende feraseto civatî yê Tirkîya ferasetêko ecêb û cîya bo zî, rewşa AKP-Erdoganî ya weçînayîşanê 24’ê Hezîrane başe nîya. Rewşa aborî, sîyasî û civatî ya zerreyî, reyna polîtîkayê bi dewletanê herême û dinya reyde, vûrîyayişî ro Tirkîya ferz kenê.
Na ra ver weçînayîşê 7’ê Hezîrane û Referandûmê 16’ê Nîsane zî te de, heme weçînayîşan de seba ke paştîdayîşê xo yê bi Erdoganî reyde eşkera bikerê, miheqeq yew-didi serokwezîr, serok dewlet yan zî rayîrberê payeberzîy êy Ewropa û Amerîka ameyêne Tirkîya.
Na kahneşopî di nêy weçînayîşî de pêk nîyamî. Heta welatanê Ewropa de propaganda kerdiş zî ro AKP-Erdoganî ame qedexe kerdene.
Reyna derûnîya Erdoganî ya ke eysena zî, na rewşe başêrî nîşan dana. Heme weçînayîşanê na ra verî de, rojdeme tim hetê Erdoganî ra ameyê dîyar kerdene. Erdoganî qisey kerdê û muxalefetî cewabê Erdoganî dayêne. Ewro tweetê Birêz Demîrtaşî yê zîndanê Edîrne ra, vatişanê Erdoganî ra zafêrî benê rojdeme.
Perro bîn de Muharrem Înce, bi ziwanê Erdoganî ke civatê Tirkîya de derbasdar o, qisey keno û Erdogan neçar maneno ke cewaban biresno Înceyî.
Yanê rojdeme dîyarkerdiş, ke weçînayîşan de esaso kifşker a, hetê Erdoganî ra nê, hetê muxlefetî ra yena dîyar kerdene.
Peynî de nêy heme erênîyan reyde zî çîyêy ke Erdogan bikero, zaf ê. Erdoganî qedera xo, malbate û dormeyê xo, bi nêy weçînayişî ya girê daya. Seba sibaroca xo, dizdî/tirtnayiş ra heta kaos, çi hewce bikero, do hewl bido ke pêk bîyaro. Gere na zaf baş bêro fehmkerdiş. Gere di sere de şaro kurd heme şarêy Tirkîya, bi terzoke heta nika nîyameyo dîyayîş, seba weçînayîşanê 24’ê Hezîrane bixebetîyê.
Bitaybetî welatîyê Tirkîya yê Ewropa, gere zafêrî xo rincan bikerê. Raydayîşî nêverdê roca peyêne û bado ke raya xo bi kar arde ro, kesanê ke rayanê xo bi kar nîyarenê bigeyrê û înan zî berê sindoqan ser.
Vurîyayîş bi dînamîkanê zerreyî pecan o. Seba naye zî 24’ê Hezîrane fersendêko baş dayo dînamîkanê zerreyî. Êdî merîfet, bikarardişê ney fersendî yo. Ya ewro, yan qet nê.